“Платина.уз” нашри 31 май куни Навоий вилояти Қизилтепа тумани ҳокими Улуғбек Файзиев бир қатор бизнеслар эгаси эканини ёзиб, бу бўйича тегишли ташкилотга сўров юборгани ҳақида хабар эълон қилганди. “Дарё” мухбирининг Коррупцияга қарши курашиш агентлигидан тасдиқлатишича, Улуғбек Файзиев чиндан ҳам бир нечта фирмаларга раҳбарлик қилади.
Нашрнинг ёзишича, туман ҳокими номида шу пайтгача 11 та МЧЖ бўлган, уларнинг 7 таси ёпилиб кетган, 4 таси ишлаб турибди. Баъзиларида Файзиевнинг ўзи 100 фоиз улушдор, айримларида катта фоизли ҳиссадор бўлган.
Очиқ манбалар ҳолатни тасдиқлади. Қизилтепа тумани ҳокими ҳозирда мавжуд “Бизнес Финанcе ЗГГ Микрокредит Ташкилоти”, “Зарафшан Golden Group”, “Зарафшан Гранд Инвест”, “Ғани Бобо Чорваси” корхоналари акциядори ҳисобланади.
Таъкидланишича, 13 июнь куни Улуғбек Файзиевнинг ноқонуний бизнеслари борлиги расман тасдиқланган.
“Коррупцияга қарши курашиш агентлиги сўровимизни ўрганиб чиққан. Ўрганиш давомида ъТадбиркорлик фаолияти эркинлигининг кафолатлари тўғрисидаъ ва ъДавлат фуқаролик хизмати тўғрисидаъги қонунлар талабларига риоя этилмагани аниқланган. Агентлик йўл қўйилган ушбу қонун бузилишларини бартараф қилиш тўғрисида Навоий вилояти ҳокимлигига тақдимнома киритганини ёзган”, — дейилади хабарда.
“Дарё” мухбири мазкур маълумотни тасдиқлаш мақсадида Коррупцияга қарши курашиш агентлиги матбуот хизмати билан боғланди.
Ҳақиқатда “Платина.уз” бу бўйича сўров юборган ва агентлик шу асосда ўрганиш олиб борди. Натижаси нашрнинг ўзига хат орқали тақдим қилинган, эълон қилинган маълумотлар тўғри”, — дея жавоб берди агентлик ходими.
2022 йил 11-октябрда кучга кирган “Давлат фуқаролик хизмати тўғрисида”ги қонуннинг 13-моддасида давлат фуқаролик хизматини ўташ билан боғлиқ чекловлар ҳақида маълумот берилган. Унга кўра, давлат фуқаролик хизматчиси тадбиркорлик фаолияти билан шуғулланишга, жумладан, тадбиркорлик фаолияти субъектларини ташкил этишга, уларнинг муассиси (иштирокчиси) бўлишга, тадбиркорлик фаолияти субъектида ташкилий-бошқарув, маъмурий-хўжалик вазифаларини бажаришга ҳақли эмас.
Маданият ва туризм вазири Озодбек Назарбеков “Коба санъат мажмуаси” МЧЖнинг таъсисчиси экани тасдиқланганди. Коррупцияга қарши курашиш агентлиги ҳолатни ўрганиб, корхона таъсисчилиги ўзгартирилган.
Изоҳ (0)