Шавкат Мирзиёев 1 июнь куни Жаҳон банкининг Европа ва Марказий Осиё минтақаси бўйича вице-президенти Антонелла Бассанини қабул қилди. Бу ҳақда Президент матбуот хизмати хабар берди.
Унга кўра, Янги Ўзбекистондаги ижтимоий-иқтисодий ислоҳотларни самарали илгари суришда Ўзбекистон билан Жаҳон банки гуруҳи ўртасидаги стратегик ҳамкорликни янада кенгайтириш масалалари кўриб чиқилди. Учрашув аввалида давлат раҳбари Антонелла Бассанини лавозимга тайинлангани билан қутлади ва муваффақиятлар тилади.
Кейинги йилларда икки томонлама шериклик муносабатларини ривожлантиришда катта ютуқларга эришилгани қайд этилди. Ўзбекистон банкнинг энг йирик бенефициарларидан биридир – лойиҳалар портфели 3 баробарга кенгайди ва бугунги кунда 11 миллиард доллардан ошди. 2026 йилга қадар Шериклик дастури 4 миллиард долларлик лойиҳаларни ўз ичига олган.
Иқлим ўзгариши ва ривожланиш бўйича Мамлакат ҳисоботини тайёрлаш якунланмоқда. Банк иштирокида тараққиёт институтлари билан амалий ҳамкорликни мувофиқлаштириш бўйича механизм – “Мамлакат платформаси” ишга туширилди.
Вице-президент Антонелла Бассани ҳамкорликнинг бугунги даражасини юқори баҳолади ҳамда Жаҳон банки мамлакатдаги ортга қайтмас ислоҳотлар дастурини изчил ва ҳар томонлама қўллаб-қувватлашга тайёрлигини тасдиқлади.
Қайд этилишича, 2030 йилга қадар муддатга белгиланган мақсадли вазифаларга мувофиқ камбағалликка қарши курашиш, қишлоқлар ва ўрта шаҳарлар инфратузилмасини модернизация қилиш, хотин-қизлар ва ёшлар бандлигига кўмаклашиш, соғлиқни сақлаш ва таълимни ислоҳ қилиш лойиҳалари диққат марказида турибди.
“Яшил” энергетикани жорий этиш, ер ислоҳотини, ҳудудларни комплекс ривожлантириш ва давлат корхоналарини хусусийлаштириш дастурларини амалга оширишга эътибор қаратилмоқда. Марказий Осиёда минтақавий инфратузилмавий лойиҳаларни илгари суриш масалалари юзасидан ҳам фикр алмашилди.