Марказий Осиё давлатлари ва Хитой махсус хизматлари ўртасида ҳамкорлик йўлга қўйилиши мумкин

Шавкат Мирзиёев 19 май куни Марказий Осиё—Хитой саммитида махсус хизматлар ўртасида ҳамкорликни йўлга қўйишни таклиф қилди.

Президентнинг таъкидлашича, Ўзбекистон барқарорлик ва хавфсизлик масалалари бўйича минтақавий мулоқотнинг бугунги даражасини юксак қадрлайди. Мамлакатлар мустақиллиги, суверенитети ва ҳудудий яхлитлиги масалалари бўйича принципиал позиция эгаллаб келинмоқда.

“Ўзбекистон Хитойнинг Бирлашган Миллатлар Ташкилоти низомига мувофиқ хавфсизликнинг бўлинмаслиги ва тинч тараққиёт тамойилларига асосланган глобал ташаббусини қўллаб-қувватлайди.

Марказий Осиё давлатлари ва Хитой махсус хизматлари ва ҳуқуқни муҳофаза қилиш идоралари ўртасида уч ёвуз куч, наркотрафик, трансчегаравий ва кибер жиноятчиликка қарши курашда яқин ҳамкорликни йўлга қўйишни таклиф этамиз.

Афғонистонда гуманитар ҳалокатга йўл қўймаслик бўйича келишилган позицияни ишлаб чиқиш ва чора-тадбирларни қабул қилиш учун Шанхай ҳамкорлик ташкилоти ҳамда Афғонистонга қўшни мамлакатлар доирасида Мулоқот гуруҳи платформаларидан тўлиқ фойдаланиш долзарбдир.

Ҳурматли Си Цзиньпин жаноблари, кеча сиз таъкидлаб ўтганингиздек, Афғонистонда инклюзив сиёсий тизимни яратиш, мамлакатларимизнинг терроризмга қарши кенг кўламли ҳамкорлик ўрнатиши билан боғлиқ масалаларни ҳамжиҳатликда илгари суришимиз муҳимдир.

Шунингдек, жаҳон ҳамжамияти ҳамда Афғонистон ҳукумати томонидан ўзаро мажбуриятларни бажариш алгоритмини ишлаб чиқиш учун Бирлашган Миллатлар Ташкилоти шафелигида юқори даражадаги халқаро гуруҳни тузиш ҳақидаги ташаббусимиз қўллаб-қувватланади, деб умид қиламиз”, — деб таъкидлади президент нутқи давомида.