“Дарё”да Қашқадарё вилоятининг Қарши шаҳрида прокуратура ходими пичоқлангани ҳақида хабар берилганди. Вилоят прокуратураси мазкур ҳолат бўйича қўшимча маълумот берди.
Қайд этилишича, 2023 йил 26 апрель куни Қарши шаҳрида яшовчи фуқаро Х.Б. таниш аёлининг уйига борганида у ерда таниши О.Т. (собиқ МИБ ходими)ни кўриб қолиб, жанжаллашган. Ва ошхонадан пичоқни олиб келиб, уларга турли даражадаги тан жароҳатлари етказган. Натижада жабрланувчилар шифохонага тушган.
“Шунингдек, Х.Б. аёл билан қонуний никоҳдан ўтмаган ҳолда доимий равишда жисмоний ва руҳий тазйиқ ўтказиб, уни қийнаб келгани аниқланган. Мазкур ҳолат юзасидан Қарши шаҳар прокуратураси томонидан 2023 йил 1 май куни Х.Б.га нисбатан Жиноят кодексининг 109-модда (қасддан баданга енгил шикаст етказиш) 110-модда (қийнаш) ва 112-модда (ўлдириш ёки зўрлик ишлатиш билан қўрқитиш)лар билан жиноят иши қўзғатилиб, дастлабки тергов ҳаракатларини олиб борилмоқда”, — дейилади вилоят прокуратураси ахборотида.
Қашқадарё прокуратурасининг расмий ахбороти ҳақида фикр билдирган “Дарё” манбаси пичоқланган ходим ўша куни шифохонага мурожаат қилиб, уйида ярим тунда ўт ўраётиб, ўроқдан жароҳат олганини билдирганини айтмоқда.
“Вилоят прокуратурасининг расмий ахборотида чалкашликлар кўп. Нега икки эркак ўз-ўзидан тортишиб, пичоқлашиб кетган. Бунинг сабаби нимада? Қолаверса, гумондор қийноққа солиш, ўлдириш билан қўрқитишда айбланаётган экан. Нега ходимни қийноққа солган? Нега уни ўлдириш билан қўрқитган. Шу масалалар очиқ қолган”, — дейди у.
Изоҳ (0)