Тошкентда ногиронлиги бўлган шахсларни очиқ меҳнат бозорида муносиб иш билан таъминлаш масалалари муҳокама қилинди

Форум “Шароит плюс” ногиронлар жамоат бирлашмаси ташаббуси билан ташкил этилган “Maxсус рекрутинг веб-портали орқали ногиронлиги бўлган шахсларни очиқ меҳнат бозорида муносиб иш билан таъминлаш” лойиҳаси доирасида Камбағалликни қисқартириш ва бандликка кўмаклашиш вазирлиги ҳамкорлигида 27 апрель куни ўтказилди.

Унда давлат ташкилотлари, халқаро ташкилотлар, шунингдек, уларнинг юридик ва кадрлар бўлими мутахассислари ҳамда ўрта ва кичик бизнес вакиллари ногиронлиги бўлган шахсларни иш билан таъминлаш муаммолари билан боғлиқ масалаларни таҳлил қилиб, ечим ва таклифлар билан бўлишди.

Форум Ўзбекистонда инклюзив иш билан таъминлашнинг муваффақиятли ҳолатларини тақдим этиш орқали иш берувчиларнинг ногиронлиги бўлган аризачиларга нисбатан қарашларини ўзгартириш, инклюзив иш берувчилар учун давлат томонидан тақдим этилаётган субсидиялар ва имтиёзлар ҳақида хусусий секторлар хабардорлигини ошириш ва маҳаллий медиа платформалари орқали аҳолининг инклюзив бандлик ҳақидаги хабардорлигини ошириш мақсадида ташкил этилди.

Форумнинг биринчи сессиясида “Ногиронлиги бўлган шахсларни ишга жойлаштиришнинг амалий тажрибаси” мавзусида муҳокамаси бўлиб ўтди. Сессия бугунги меҳнат бозоридаги малакали кадрларга қанчалик катта эҳтиёж сезилаётгани, ногиронлиги бўлган шахсларни ҳам маълум соҳаларда ўз ўрнини топишларига кўмаклашиш долзарб аҳамиятга эга эканлиги, иш жойида махсус шароитлар яратиш ва, шу орқали, ногиронлиги бўлган шахсларга даромад олиш имконини тақдим этиш ҳақида суҳбат олиб борилди.

Форумнинг иккинчи сессияси “Ногиронлиги бўлган шахсларни хизмат кўрсатиш соҳасига ишга киритишнинг амалий тажрибаси”га бағишланди. Ушбу сессияда инклюзив иш билан таъминлаш борасидаги муваффақиятли ҳолатлар муҳокама қилинди ва шу ўринда ногиронларни иш билан таъминлашдаги муаммоли масалалар кўриб чиқилиб, турли шаклдаги ногиронлиги бўлган шахсларни иш билан таъминлашдан манфаатдор бўлган йирик, ўрта ва кичик бизнес вакиллари ҳамда уларнинг юридик бўлим ва кадрлар бўлими ҳодимлари билан суҳбат бўлиб ўтди.

Форумнинг учинчи сессияси “Ногиронлиги бўлган шахсларни халқаро ташкилотларга ишга жойлаштиришнинг амалий тажрибаси” мавзусида бўлиб ўтди. Унда Британия Кенгаши, Жаҳон банки ва, шунингдек, UNICEF’нинг Ўзбекистондаги ваколатхонаси вакиллари ўз фикрларини беришди ва ногиронлиги бўлган шахсларни халқаро ташкилотларга ишга жойлаштиришдаги муҳим омиллар ҳақида нутқ сўзлади.

Форумнинг сўнгги сессияси “Инклюзив бизнес учун имкониятлар” мавзусида бўлиб, спикерлар ногиронлиги бўлган шахслар учун мавжуд имтиёзлар ва преференсиялар ҳақида нутқ сўзлади: Ўзбекистонда ногиронлиги бўлган шахсларни ишга жойлаштиришда иш берувчилар олдида қандай мажбуриятлар бор? Мавжуд имтиёзлар ва преференциялар ҳақида хусусий секторлар хабардорлигини оширишда қандай чора тадбирлар олиб борилмоқда? каби саволларга жавоб бериш билан бирга, спикерлар ушбу соҳада мавжуд муаммоларга ечим топиш йўлларига тўхталиб ўтди.

Форум якуни сифатида инклюзив иш берувчиларни тақдирлаш маросими бўлиб ўтди.