Ҳозиргина нонушта қилдингиз ва аллақачон қўшимча яна нимадир ейишга ошиқяпсизми? Бир неча дақиқа олдин тушлик қилдингиз, аммо ошқозонингиз кўпроқ нарсани сўраяпти. Агар бироз аввал овқатланган бўлсангиз ҳам, очликни ҳис қилсангиз, нима қилиш керак ва бу муаммонинг сабаби нима? Батафсил ушбу мақола орқали билиб олинг, деб ёзади “Lifehacker”.
Сабаблари
Сув етишмаслиги
Организм сувсизланса, биз чанқоқни очлик деб ўйлаймиз. Агар сиз яқинда овқатланган бўлсангиз ва очликни ҳис қилсангиз, бир стакан сув ичишга ҳаракат қилинг.
Кўпчилик таъкидлаганидек, кунига сув миқдори саккиз стакан бўлиши шарт эмас. Бунинг ўрнига, организм вазнининг килограммига 35 мл сув ичишни мақсад қилиб қўйиш лозим.
Уйқу бузилиши
Ёмон уйқу гормонал номутаносиблик билан боғлиқ бўлиб, очлик туйғусини кучайтиради. Аммо тадқиқотчилар уйқуси меъёрда бўлмаган одамлар, ҳатто ҳозиргина овқатланган бўлса ҳам, музлаткичдан нимадир олиб ейишга кўпроқ мойил бўлишини аниқладилар. Олимларнинг фикрича, инсон яхши дам олганидан кўра уйқусиз қолганида деярли икки баробар кўп овқатланади.
Оқсилнинг етарли эмаслиги
Тадқиқотлар шуни кўрсатадики, оқсил нафақат очлик гормони грелин даражасини пасайтиради, балки бизга тўйимлилик ҳиссини берадиган гормон “ЙЙ пептид” даражасини ҳам оширади.
Овқатланаётганда диққат жамланмаслиги
Таом тановул қилиш пайтида чалғитадиганлар, диққатини таомга қаратганларга қараганда кўпроқ оч қоладилар. Шу боис овқатланиш учун маълум вақт ажратиш, уни яхшилаб чайнаш ва ҳар бир луқманинг таъми ва ҳидидан завқланиш тавсия этилади. Бундай ишларни бажариш овқат ҳазм қилиш тизимининг янада самарали ишлашига ёрдам беради.
Стресс
Маълумки, стресс очликни кучайтирувчи кортизол гормони даражасини оширади.
Кундалик жисмоний машқларни кун тартибига киритиш орқали кортизол даражасини пасайтиришга ҳаракат қилинг ва медитация иловаларини юклаб олишни ўйлаб кўринг.
Овқатни кам истеъмол қилиш
Қайси диетада бўлишингиз муҳим эмас — шунчаки тўйиб овқатланмаслигингиз мумкин. Эҳтимол, вазнингиз, бўйингиз, жисмоний фаоллик даражангизни ҳисобга олмайсиз ва организм етарли миқдордаги озуқа моддаси билан таъминланмайди. Шу тариқа овқатдан кейин ҳам доимий очлик ҳисси сизни ташвишга солади.
Қатъий парҳезларни танламанг. Аёл кунига тахминан 1800-2200 калория, ўртача баландликдаги эркак тахминан 2200-2800 калория истеъмол қилиши керак.
Касаллик
Доимий очлик диабет, гипогликемия ёки гипертироидизм каби тиббий ҳолатнинг аломати бўлиши мумкин. Муаммо доимо безовта қилса, шифокор билан маслаҳатлашиш зарур.
Доимо овқатланишни истасангиз, нима қилиш керак?
Зериккандан, стрессдан ёки бошқа нарсадан овқатланишни хоҳлайсизми, у билан курашишнинг турли усуллари мавжуд. Агар доимо овқат ейиш ҳиси сизни қийнаса, иштаҳангизни қандай камайтириш бўйича ушбу тавсияларга амал қилиб кўринг.
Таом ҳажми ва ингредиентларни қайта кўриб чиқинг
Баъзи овқатлар, айниқса, оқсил ва соғлом ёғларнинг етишмаслиги, гарчи ўзингизни жисмонан тўйган ҳис қилсангиз ҳам, кўпроқ овқатланиш истагини туғдиради.
Таом ва газакларингизда зайтун мойи, авокадо ёки ёнғоқ каби соғлом ёғ манбалари ҳамда гўшт, парранда гўшти ёки балиқ каби оқсил манбалари борлигига ишонч ҳосил қилинг.
Вақтни мазмунли ўтказинг
Одамлар очликни ҳис қилишининг умумий сабаби зерикишдир. Шундай деб гумон қилсангиз, овқатланиш ўрнига ўзингиз ёқтирган нарса билан шуғулланишга ҳаракат қилинг — севимли машғулотлар, уй юмушлари, сайр қилиш — бу ҳар қандай фаолият бўлиши мумкин.
Аввалига бу ноқулай туюлиши табиий, лекин муҳим ишни бошлаганингиздан ёки янги севимли машғулотингиз сизни овқат еб қўйишдан чалғитади.
Кучли ҳис-туйғулар ва стресс билан курашишни ўрганинг
Аксар одамлар стресс, қайғу ёки бошқа кучли ҳис-туйғуларни бошдан кечираётганда очликни ҳис қилади. Озиқ-овқат қисқа муддатли тасалли берса-да, бу муаммонинг илдизини ҳал қилмайди.
Кучли ҳис-туйғуларни бошдан кечирган вақтларда сайр қилиш, кундалик ёзиш ёки медитация билан шуғулланиш орқали дам олишга ҳаракат қилинг. Бу овқатланмасдан туриб улар билан курашишга ёрдам беради.
Агар сизни хавотир, қайғу ёки бошқа бирор муаммо қийнаса, муаммони ҳал қилиш учун психологга мурожаат қилинг.
Овқатдан завқ олинг
Аслини олганда, завқ билан овқатланиш — бу овқат вақтида диққатни таомга қаратиш демакдир.
Мисол учун баъзи одамлар телекўрсатувни томоша қилаётганда, ижтимоий тармоқларни кўздан кечираётганда овқатланишади.
Ҳар бир луқмани яхшилаб чайнаш ва овқатланаётган нарсанинг таъми ва тузилиши ҳақида ўйлаш муҳимдир. Бундан ташқари, сиз овқатланаётганда ҳис-туйғуларингиз ва фикрларингизга эътибор беришингиз керак. Шунда овқатланишдан кўпроқ завқланишни бошлайсиз ва шу билан қониқиш ҳисини туясиз.
Изоҳ (0)