Hozirgina nonushta qildingiz va allaqachon qo‘shimcha yana nimadir yeyishga oshiqyapsizmi? Bir necha daqiqa oldin tushlik qildingiz, ammo oshqozoningiz ko‘proq narsani so‘rayapti. Agar biroz avval ovqatlangan bo‘lsangiz ham, ochlikni his qilsangiz, nima qilish kerak va bu muammoning sababi nima? Batafsil ushbu maqola orqali bilib oling, deb yozadi “Lifehacker”.
Sabablari
Suv yetishmasligi
Organizm suvsizlansa, biz chanqoqni ochlik deb o‘ylaymiz. Agar siz yaqinda ovqatlangan bo‘lsangiz va ochlikni his qilsangiz, bir stakan suv ichishga harakat qiling.
Ko‘pchilik ta’kidlaganidek, kuniga suv miqdori sakkiz stakan bo‘lishi shart emas. Buning o‘rniga, organizm vaznining kilogrammiga 35 ml suv ichishni maqsad qilib qo‘yish lozim.
Uyqu buzilishi
Yomon uyqu gormonal nomutanosiblik bilan bog‘liq bo‘lib, ochlik tuyg‘usini kuchaytiradi. Ammo tadqiqotchilar uyqusi me’yorda bo‘lmagan odamlar, hatto hozirgina ovqatlangan bo‘lsa ham, muzlatkichdan nimadir olib yeyishga ko‘proq moyil bo‘lishini aniqladilar. Olimlarning fikricha, inson yaxshi dam olganidan ko‘ra uyqusiz qolganida deyarli ikki barobar ko‘p ovqatlanadi.
Oqsilning yetarli emasligi
Tadqiqotlar shuni ko‘rsatadiki, oqsil nafaqat ochlik gormoni grelin darajasini pasaytiradi, balki bizga to‘yimlilik hissini beradigan gormon “YY peptid” darajasini ham oshiradi.
Ovqatlanayotganda diqqat jamlanmasligi
Taom tanovul qilish paytida chalg‘itadiganlar, diqqatini taomga qaratganlarga qaraganda ko‘proq och qoladilar. Shu bois ovqatlanish uchun ma’lum vaqt ajratish, uni yaxshilab chaynash va har bir luqmaning ta’mi va hididan zavqlanish tavsiya etiladi. Bunday ishlarni bajarish ovqat hazm qilish tizimining yanada samarali ishlashiga yordam beradi.
Stress
Ma’lumki, stress ochlikni kuchaytiruvchi kortizol gormoni darajasini oshiradi.
Kundalik jismoniy mashqlarni kun tartibiga kiritish orqali kortizol darajasini pasaytirishga harakat qiling va meditatsiya ilovalarini yuklab olishni o‘ylab ko‘ring.
Ovqatni kam iste’mol qilish
Qaysi diyetada bo‘lishingiz muhim emas — shunchaki to‘yib ovqatlanmasligingiz mumkin. Ehtimol, vazningiz, bo‘yingiz, jismoniy faollik darajangizni hisobga olmaysiz va organizm yetarli miqdordagi ozuqa moddasi bilan ta’minlanmaydi. Shu tariqa ovqatdan keyin ham doimiy ochlik hissi sizni tashvishga soladi.
Qat’iy parhezlarni tanlamang. Ayol kuniga taxminan 1800-2200 kaloriya, o‘rtacha balandlikdagi erkak taxminan 2200-2800 kaloriya iste’mol qilishi kerak.
Kasallik
Doimiy ochlik diabet, gipoglikemiya yoki gipertiroidizm kabi tibbiy holatning alomati bo‘lishi mumkin. Muammo doimo bezovta qilsa, shifokor bilan maslahatlashish zarur.
Doimo ovqatlanishni istasangiz, nima qilish kerak?
Zerikkandan, stressdan yoki boshqa narsadan ovqatlanishni xohlaysizmi, u bilan kurashishning turli usullari mavjud. Agar doimo ovqat yeyish hisi sizni qiynasa, ishtahangizni qanday kamaytirish bo‘yicha ushbu tavsiyalarga amal qilib ko‘ring.
Taom hajmi va ingrediyentlarni qayta ko‘rib chiqing
Ba’zi ovqatlar, ayniqsa, oqsil va sog‘lom yog‘larning yetishmasligi, garchi o‘zingizni jismonan to‘ygan his qilsangiz ham, ko‘proq ovqatlanish istagini tug‘diradi.
Taom va gazaklaringizda zaytun moyi, avokado yoki yong‘oq kabi sog‘lom yog‘ manbalari hamda go‘sht, parranda go‘shti yoki baliq kabi oqsil manbalari borligiga ishonch hosil qiling.
Vaqtni mazmunli o‘tkazing
Odamlar ochlikni his qilishining umumiy sababi zerikishdir. Shunday deb gumon qilsangiz, ovqatlanish o‘rniga o‘zingiz yoqtirgan narsa bilan shug‘ullanishga harakat qiling — sevimli mashg‘ulotlar, uy yumushlari, sayr qilish — bu har qanday faoliyat bo‘lishi mumkin.
Avvaliga bu noqulay tuyulishi tabiiy, lekin muhim ishni boshlaganingizdan yoki yangi sevimli mashg‘ulotingiz sizni ovqat yeb qo‘yishdan chalg‘itadi.
Kuchli his-tuyg‘ular va stress bilan kurashishni o‘rganing
Aksar odamlar stress, qayg‘u yoki boshqa kuchli his-tuyg‘ularni boshdan kechirayotganda ochlikni his qiladi. Oziq-ovqat qisqa muddatli tasalli bersa-da, bu muammoning ildizini hal qilmaydi.
Kuchli his-tuyg‘ularni boshdan kechirgan vaqtlarda sayr qilish, kundalik yozish yoki meditatsiya bilan shug‘ullanish orqali dam olishga harakat qiling. Bu ovqatlanmasdan turib ular bilan kurashishga yordam beradi.
Agar sizni xavotir, qayg‘u yoki boshqa biror muammo qiynasa, muammoni hal qilish uchun psixologga murojaat qiling.
Ovqatdan zavq oling
Aslini olganda, zavq bilan ovqatlanish — bu ovqat vaqtida diqqatni taomga qaratish demakdir.
Misol uchun ba’zi odamlar teleko‘rsatuvni tomosha qilayotganda, ijtimoiy tarmoqlarni ko‘zdan kechirayotganda ovqatlanishadi.
Har bir luqmani yaxshilab chaynash va ovqatlanayotgan narsaning ta’mi va tuzilishi haqida o‘ylash muhimdir. Bundan tashqari, siz ovqatlanayotganda his-tuyg‘ularingiz va fikrlaringizga e’tibor berishingiz kerak. Shunda ovqatlanishdan ko‘proq zavqlanishni boshlaysiz va shu bilan qoniqish hisini tuyasiz.
Izoh (0)