Фарғона вилояти Қўқон шаҳрида корхона ходими иш вақтида ҳалок бўлди. Бу ҳақда “Замон” дастурида хабар берилди.
Хабарга кўра, фуқаро Д. Қўқон шаҳридаги МЧЖ раҳбари лавозимида ишлаб келиб, техника хавфсизлиги ва меҳнатни муҳофаза қилишнинг бошқа қоидаларига риоя қилишга масъул шахс бўлгани ҳолда, фуқаро Й.ни ёлланма ишчи сифатида ишга қабул қилган. У “Меҳнатни муҳофаза қилиш тўғрисида”ги қонуннинг 23- ва 25-моддалари талабларини бузиб, Й.ни технологик қурилмалар ва улар билан боғлиқ конструкциялар монтажчиси вазифасига тайинлаган.
Шунингдек, ходимни шартнома асосида йирик заводлардан бирининг ишлаб чиқариш цехидаги тайёр маҳсулотларни қадоқлаш омборига демонтаж ишларини бажариш учун жалб этган. Ходим иш жараёнида хавфсизлик қоидаларига амал қилмаган ҳолда, баландлиги 18 метр бўлган учта қадоқлаш бункерининг таянч қисмларини безак ёрдамида кесган вақтда бункерлар қулаб тушган. Қурилманинг остида қолган ходим ҳодиса жойида ҳалок бўлган.
Ҳолат юзасидан юритилган жиноят иши Қўқон судида кўриб чиқилди. Судланувчи айбига тўлиқ иқрорлигини, жабрланувчининг оила аъзоларига моддий ёрдам кўрсатгани, марҳумнинг дафн маросимларини ўтказгани, унинг рафиқаси ҳисоб рақамига кўп миқдорда пул қўйгани ва бошқа жиҳатларни инобатга олиб, суддан енгиллик сўради.
Қайд этилишича, айбдор қилмишидан чин кўнгилдан пушаймонлиги, муқаддам судланмагани, нафақа ёшидалиги, етказилган зарар тўлиқ қопланиб, жабрланувчининг қонуний вакилининг унга нисбатан даъвоси йўқлиги инобатга олиниб, жарима жазоси тайинланди.
Изоҳ (0)