Озарбайжон президенти Илҳом Алиев Тоғли Қорабоғ ҳудудида яшовчи арманлар танлов қилишлари кераклигини айтди. Бу ҳақда “РИА Новости” хабар берди.
Алиевнинг сўзларига кўра, улар Озарбайжон фуқаролигини қабул қилиш ёки яшаш учун бошқа жой танлаши керак. Сиёсатчи Арманистон Озарбайжонга нисбатан ҳудудий даъволари йўқлигини расман эълон қилиши кераклигини таъкидлади.
“Ҳеч бир давлат билан ички ишларимизни муҳокама қилмаслигимизни бир неча бор таъкидлаганмиз. Қорабоғ — ички ишимиз. Қорабоғда яшовчи арманлар ё Озарбайжон фуқаролигини қабул қилиши ё бошқа яшаш жойи излаши керак”, — деди Илҳом Алиев АzTV телеканалига берган интервьюсида.
Унинг сўзларига кўра, бу масалада Тоғли Қорабоғ аҳолисига “барча демократик асослар” таклиф қилинган.
Алиевнинг қўшимча қилишича, Арманистон 1991 йилдаги Олмаота декларацияси асосида тинчлик шартномасига келишишга тайёрлигини билдирган. Бу Боку ва Ереван томонидан 2022 йилда Сочи (Россия воситачилигида) ва Прагадаги (Туркия ва Европа Иттифоқи воситачилигида) конференцияларда имзоланган келишувлардан келиб чиқади. Шу муносабат билан, Озарбайжон раҳбари “Қорабоғ—Озарбайжон” эканини Ереван расман тан олиши кераклигини айтди.
Олмаота декларацияси СССР парчаланганидан кейин қатор республикалар, жумладан, Арманистон ва Озарбайжон томонидан имзоланган ҳужжатдир. У 1991 йил чегаралари доирасида собиқ иттифоқ республикаларининг ҳудудий яхлитлигини белгилаган. Ўшанда Тоғли Қорабоғ Озарбайжон таркибига кирган, бироқ декларацияда бу ҳудуднинг мақоми кўрсатилмаган.
Тоғли Қорабоғ мустақиллиги тарафдорлари фикрича, декларация ҳудуднинг Бокудан мустақиллиги мақомини расман белгилайди. Озарбайжон бу позицияга рози эмас, Россия ташқи ишлар вазири Сергей Лавров ҳам бунга қарши чиққан. Арманистон бош вазири Никол Пашинян Озарбайжоннинг Озарбайжон ССР чегараларидаги яхлитлигини тан олишга тайёрлигини билдирган.
Изоҳ (0)