Украинанинг тинч аҳолисига жиддий хавф туғилган тақдирда, Жанубий Корея мамлакатга қурол етказиб беришни бошлаши мумкин, деди Жанубий Корея президенти Юн Сок Ёль Reuters агентлигига берган интервьюсида.
“Агар халқаро ҳамжамият тоқат қила олмайдиган вазият юзага келса, масалан, тинч аҳолига кенг миқёсли ҳужумлар бўлса ёки уруш қонунлари жиддий бузилса, биз учун фақат гуманитар ёки молиявий ёрдам билан чекланиш қийин бўлади”, — деди у. Reuters қайд этишича, бу Жанубий Корея президентининг Киевга қурол бериш мумкинлиги ҳақида илк баёноти.
Юн Сок Ёлнинг сўзларига кўра, халқаро ҳуқуқ Украина мудофааси ва мамлакатнинг қайта тикланишини қўллаб-қувватлаш даражасини чекламайди. Уруш зонасидаги вазият ва можаро томонлари билан муносабатларнинг ривожланишини инобатга олган ҳолда, Жанубий Корея расмийлари “энг мақбул чоралар”ни кўради.
Сеул Киевга инсонпарварлик ёрдами, шунингдек, дубулға ва зирҳли нимчалар сингари ҳарбий буюмлар етказиб бермоқда. The Washington Post газетаси Пентагоннинг интернетда тарқалган ҳужжатларига таяниб ёзишича, Жанубий Корея етакчисининг ёрдамчилари Вашингтон кейинчалик Украинага юбориши мумкин бўлган ўқ-дориларни АҚШга етказиб бериш борасида иккиланиб турибди. АҚШ президенти Жо Байден Юн Сок Ёлга бевосита қўнғироқ қилиб, қурол етказиб беришни талаб қилиши кутилаётган эди. Маълумотларга кўра, Сеул “Вашингтон босими ва Жанубий Кореянинг уруш томонларига ҳалокатли қуроллар етказиб беришни тақиқловчи расмий сиёсати орасида қолиб кетган”.
Польша бош вазири Матеуш Моравецки Жанубий Корея “Россия ва Хитойнинг муносабатидан қўрқаётганини” айтди. Жанубий Кореянинг Украинадаги собиқ элчиси Квон Ки Чангнинг фикрича, Сеул Москва томонидан “иқтисодий ва дипломатик қасос”га дуч келиши мумкин.
Изоҳ (1)
Нега матн очилмайди.