Наманган вилояти Норин туманидаги фитнес клубда йигитлар ўртасида муштлашув содир бўлди. Бу ҳақда вилоят Ички ишлар бошқармаси ахборот хизмати хабар берди.
Хабарга кўра, Норин туманида яшовчи 2003 йилда туғилган фуқаро 14 март куни соат 20:40 ларда икки нафар дўсти билан жамиятда юриш-туриш қоидаларини қасддан менсимай, жамоат жойи ҳисобланган “Бўз Ўлмас” маҳалласида жойлашган фитнес клубда жанжал содир этган. Улар ўзларига таниш бўлган 2002 йилда туғилган фуқаро билан унинг елкасига тегиб кетганини баҳона қилиб, ўзаро жанжаллашган.
Йигитлар мазкур фуқарони қўл ва оёқларини уриб, дўппослаб, қасддан унга тан жароҳати етказган. Суд тиббий экспертизасининг хулосасида жабрланувчининг танасида ўнг қош соҳаси, ўнг пастки лаб соҳасида чокланган жароҳати, ўнг юқори қовоқ ва пастки қовоқ соҳасида қонталаш кўринишдаги тан жароҳати мавжудлиги, ушбу тан жароҳати оғирлик даражасига кўра, соғлиғининг бузилишига сабабчи бўлган енгил тан жароҳатлари гуруҳига кириши кўрсатилган.
Тергов бўлинмаси томонидан ҳолат юзасидан Жиноят кодексининг 277-моддаси 2-қисми “б” банди билан жиноят иши қўзғатилиб, фуқароларга нисбатан гаров тариқасида эҳтиёт чораси танланган. Жиноят иши айблов хулосаси билан тамомланиб, тегишли суд муҳокамасига юборилган.
Изоҳ (0)