Бахтиёр Саидов ва Украина элчиси икки томонлама ҳамкорлик масалаларини муҳокама қилди

Ўзбекистон ташқи ишлар вазири вазифасини бажарувчи Бахтиёр Саидов 2 февраль куни Украина элчиси Николай Дорошенкони қабул қилди.

ТИВ матбуот хизматининг маълум қилишича, турли соҳалардаги Ўзбекистон—Украина икки томонлама ҳамкорлигининг долзарб масалалари муҳокама қилинди. Савдо-иқтисодий йўналишда алоқаларни жадаллаштириш бўйича қўшма чора-тадбирлар кўриш муҳимлиги қайд этилди.

“Украина элчиси Николай Дорошенко билан конструктив мулоқот ўтказдим. Ўзбекистон—Украина ҳамкорлигининг қатор жиҳатларини, шу жумладан иқтисодиёт ва савдо соҳасидаги алоқаларни муҳокама қилдик”, — деб ёзган Бахтиёр Саидов ўзининг Telegram-каналида.