“Толибон” армияси бош штаби бошлиғи Фасиҳуддин Фитрат Афғонистон ҳаво ҳудудида дронларнинг учишини қоралади ва армия зенит-ракеталардан фойдаланиш имкониятига эга бўлишини айтди. Бу ҳақда “Дарё”нинг Афғонистондаги мухбири хабар берди.
Фитрат асосий эътибори Афғонистон ҳаво ҳудудини дронлар ва бошқа ҳужумлардан ҳимоя қилиш эканини айтди. У ҳар бир мамлакат ҳудуди ва ҳаво кенгликларини ҳимоя қилиш учун зенит-ракеталарга эҳтиёжи борлигини таъкидлади. “Толибон” расмийси Афғонистон ҳам шу учун бундай қурол тизимига эга бўлишга интилаётганини айтди.
“Ҳеч шубҳа йўқки, Афғонистон унга эга бўлиш учун қўлидан келганини қилмоқда. Биз ҳаво ҳудудимизни ҳимоя қилиш ва бунаг ечим топиш учун қўлимиздан келганини қиламиз. Бунинг устида бор кучимиз билан ишлаймиз ва уни қаердан олишимиз ҳам сир”, — деди Фитрат.
Бироқ у ракеталар қандай харид қилиниши ҳақида қўшимча маълумот бермади. “Толибон” армияси штаб бошлиғи ўз кучларини кўпайтиришни режалаштираётгани ва Афғонистондаги энг катта бюджет армияга йўналтирилаётганини таъкидлади.
“Толибон” армияси штаби бошлиғи Америка томонидан Афғонистон ҳаво ҳудуди бузилганини эслаб, буни танқид қилди.
Эслатиб ўтамиз, Афғонистонда “Толибон” режимининг ўрнатилиши билан АҚШ Афғонистоннинг турли ҳудудларида ҳаво ҳужумларини амалга оширган бўлиб, улардан бири Кобулда Ал-Қоида етакчиси Айман ал-Завоҳирийга қилинган ҳужумдир.
Изоҳ (0)