Rossiya tarkibidagi Tatariston respublikasi Oliy sudi Qozon shahridagi gimnaziyada ommaviy qotillik sodir etgan 21 yoshli Ilnaz Galyaviyevni umrbod qamoq jazosiga hukm qildi, deb yozmoqda Meduza.

2021-yil 11-may kuni Qozon shahridagi 175-sonli gimnaziyaga qurolli hujum uyushtirilgan edi. Hujum oqibatida yetti nafar bola va ikki nafar o‘qituvchi halok bo‘lgan, 23 kishi, asosan, bolalar yaralangan. O‘sha paytda 19 yoshda bo‘lgan hujumchi Galyaviyev shu gimnaziyaning bitiruvchisi bo‘lgan. U voqea joyida qo‘lga olingan.

Jinoyat ishini tergov qilish jarayonida Galyaviyev dastlab aqli noraso deb topilgan, biroq ikkinchi ekspertiza uning aqli joyida ekanini ko‘rsatgan.

Avvalroq Rossiyaning Perm davlat universitetida ommaviy qotillik sodir etgan sobiq talaba Timur Bekmansurov umrbod qamoq jazosiga hukm qilingan edi. Shuningdek, ayblanuvchi halok bo‘lganlar va jarohatlanganlarning oilalariga 18 million 300 ming rubl tovon puli to‘lashi kerak.

2021-yilning 20-sentabr kuni Timur Bekmansurov o‘zi tahsil olayotgan Perm davlat milliy tadqiqot universiteti hududida otishma sodir etgan. Hodisa oqibatida olti kishi halok bo‘lgan, 40 dan ortiq odam jarohatlangan. Hibsga olish vaqtida Bekmansurov yaralangan, keyinroq jarohati oqibatida uning oyog‘i kesib tashlangan.