Қуддусдаги Ал-Ақсо масжидида Исроил хавфсизлик кучлари билан тўқнашувда ўнлаб фаластинликлар яраланди, деб хабар бермоқда Фаластиннинг WAFA агентлиги манбаларга таяниб.
Манбаларга кўра, 4 апрель куни кечқурун Исроил кучлари масжид намозхонасига бостириб кириб, у ердаги фаластинликларга шовқин тарқатувчи гранаталар, заҳарли газ, резина ўқ ва бошқа воситалар ёрдамида ҳужум қилган. Агентлик маълумотларига кўра, масжидга бостириб кирган Исроил хавфсизлик кучлари дубинка ва қўндоқлардан ҳам фойдаланган.
Фаластинлик маҳбуслар ишлари бўйича қўмита воизи Риёд ал-Ашкар журналистларга берган маълумотига кўра, Исроил Ал-Ақсода уюштирган рейд якунида 200 дан ортиқ фаластинликни қўлга олган. Унга кўра, қўлга олинганлар Исроилнинг Қуддус, Анатадаги ҳарбий базасига ўтказилган.
“Ал-Ақсо масжидида яраланганларнинг бир қисми зудлик билан даволанишга муҳтож”, — деди ал-Ашкар ва Исроил уларни даволаш ёки шифохоналарга юборишдан бош тортаётганини қўшимча қилди.
Фаластин матбуотининг қайд этишича, рейддан сўнг Ғарбий Соҳилнинг бир қатор шаҳарларида намойишлар бошланган. Фаластин бош вазири Муҳаммад Штайе Ал-Ақсо масжидида содир бўлган воқеалар “намозхонларга қарши оғир жиноят” эканини айтди.
1 апрель куни Исроил хавфсизлик кучлари Ал-Ақсо масжиди жойлашган Маъбад тоғи мажмуасига кириш жойларидан бирида фаластинлик йигитни отиб ўлдиргани хабар қилинган эди. Ҳодисага гувоҳ фаластинлик диндорларнинг айтишича, Ал-Ақсо дарвозаси яқинида Исроил кучлари масжидга киришга уринган аёлга зўравонлик қилгач, йигит улар билан жанжаллашган. Исроил полицияси уни отиб ташлаган. Гувоҳларнинг айтишича, унга камида 10 марта ўқ узишган.
Исроил томони эса полиция йигитни Ал-Ақсо масжиди олдида сўроқ қилиш учун тўхтатгани, йигит унинг қуролини тортиб олишга уринганини айтди.
Изоҳ (0)