Туркманистон Халқ маслаҳати (Халқ кенгаши) раиси, республиканинг собиқ президенти Гурбангули Бердимуҳамедов 16 март куни Анқарада бўлиб ўтган Туркий давлатлар ташкилоти саммити чоғида Туркия раҳбари Ражаб Тоййиб Эрдўғоннинг номзодини тинчлик бўйича Нобел мукофотига таклиф қилди.
Бердимуҳамедов Эрдўғонни 22 йилдан бери таниши, уни ажойиб шахс ва сиёсатчи деб билишини айтди. Туркманистонлик сиёсатчи Туркия президентининг “минтақавий ва глобал миқёсда тинчлик, хавфсизлик ва барқарор тараққиётни мустаҳкамлаш”га қўшган ҳиссасини ҳам қайд этди.
“Шундан келиб чиқиб, Туркия республикаси президентининг номзодини тинчлик бўйича Нобел мукофотига кўрсатиш таклиф қилинмоқда, биз тегишли таклифларнинг барчасини тўлиқ қўллаб-қувватлаймиз. У ушбу халқаро мукофотга лойиқ раҳбар”, — деди Туркманистоннинг собиқ раҳбари.
“XXI асрда ислом дунёси мамлакатлари давлат ва ҳукумат раҳбарлари орасида ушбу мукофотга сазовор бўлган биринчи шахс сифатида Ражаб Тоййиб Эрдўғон номи тарихнинг олтин саҳифаларига ёзилса, мақсадга мувофиқ бўларди”, — дея қўшимча қилди Бердимуҳамедов.
ТДT саммити фавқулодда вазиятларни бошқариш ва гуманитар ёрдам соҳасида кўп томонлама ҳамкорликни ривожлантириш, шунингдек, табиий офатлар олдини олиш ва оқибатларини бартараф этиш бўйича саъй-ҳаракатларни мувофиқлаштиришга бағишланди.
Тадбирда ТДTга аъзо барча беш давлат – Ўзбекистон, Озарбайжон, Қозоғистон, Қирғизистон ва Туркия президентлари иштирок этди. Иштирокчилар орасида ташкилот бош котиби Кубаничбек Омуралиев ва кузатувчи давлатлар вакиллари: Туркманистон Халқ ьаслаҳати раиси Гурбангули Бердимуҳамедов ва Венгрия бош вазири Виктор Орбан ҳам бор эди.
Изоҳ (0)