Hindiston hukumati Xitoy va Pokiston bilan ziddiyat sharoitida armiya uchun katta miqdorda qurol sotib olishni ma’qulladi. Raketalar, vertolyotlar, artilleriya va radioelektron kurashish tizimlarini sotib olishga 8,5 milliard dollar sarflanadi, deb yozmoqda Reuters.
Hindiston bu safar qurollarni xorijdan sotib olish o‘rniga buyurtmalarning barchasini mahalliy ishlab chiqarish kompaniyalariga berishni rejalashtirmoqda. Bu Hindiston harbiy-sanoat kompleksini mustahkamlashni maqsad qilgan amaldagi bosh vazir Narendra Modining strategiyasini namoyon qiladi.
“Pokiston kuchlari, Himolay tog‘laridagi bahsli chegara bo‘ylab Xitoy qo‘shinlari bilan ziddiyatda turgan Hindiston Sovet davridagi harbiy texnikani modernizatsiya qilishga intilmoqda”, — deb yozadi Reuters.
Hindiston mamlakat harbiy-dengiz floti rivojiga alohida e’tibor qaratmoqda, chunki hukumat o‘tgan yildan buyon Xitoyning Hind okeanidagi faolligi oshganidan xavotirda.
Shuningdek, tasdiqlangan xaridlar ro‘yxatiga 300 km masofaga uchadigan 200 ta BrahMos raketalari, 50 ta umumiy maqsadli vertolyotlar, Su-30MKI qiruvchi samolyotlari uchun uzoq masofaga uchuvchi raketalar, 307 ta 155 kalibrli gaubitsalar, shuningdek, yo‘ltanlamas avtomobillar va traktorlar kiritilgan.
Hindiston o‘zining ikki qo‘shnisi Xitoy va Pokiston bilan yaxshi munosabatda emas. Ilgari ular bilan harbiy to‘qnashuvlar sodir bo‘lgan, vaqti-vaqti bilan shunday to‘qnashuvlar sodir bo‘lib turadi. Hindiston, ayniqsa, muhim harbiy va iqtisodiy ustunlikka ega Xitoydan xavotirda. Bundan tashqari, yaqinda Pekin harbiy xarajatlarni keskin oshirganini e’lon qilgandi.
Izoh (0)