Turkmaniston Xalq maslahati (Xalq kengashi) raisi, respublikaning sobiq prezidenti Gurbanguli Berdimuhamedov 16-mart kuni Anqarada bo‘lib o‘tgan Turkiy davlatlar tashkiloti sammiti chog‘ida Turkiya rahbari Rajab Toyyib Erdo‘g‘onning nomzodini tinchlik bo‘yicha Nobel mukofotiga taklif qildi.
Berdimuhamedov Erdo‘g‘onni 22 yildan beri tanishi, uni ajoyib shaxs va siyosatchi deb bilishini aytdi. Turkmanistonlik siyosatchi Turkiya prezidentining “mintaqaviy va global miqyosda tinchlik, xavfsizlik va barqaror taraqqiyotni mustahkamlash”ga qo‘shgan hissasini ham qayd etdi.
“Shundan kelib chiqib, Turkiya respublikasi prezidentining nomzodini tinchlik bo‘yicha Nobel mukofotiga ko‘rsatish taklif qilinmoqda, biz tegishli takliflarning barchasini to‘liq qo‘llab-quvvatlaymiz. U ushbu xalqaro mukofotga loyiq rahbar”, — dedi Turkmanistonning sobiq rahbari.
“XXI asrda islom dunyosi mamlakatlari davlat va hukumat rahbarlari orasida ushbu mukofotga sazovor bo‘lgan birinchi shaxs sifatida Rajab Toyyib Erdo‘g‘on nomi tarixning oltin sahifalariga yozilsa, maqsadga muvofiq bo‘lardi”, — deya qo‘shimcha qildi Berdimuhamedov.
TDT sammiti favqulodda vaziyatlarni boshqarish va gumanitar yordam sohasida ko‘p tomonlama hamkorlikni rivojlantirish, shuningdek, tabiiy ofatlar oldini olish va oqibatlarini bartaraf etish bo‘yicha sa’y-harakatlarni muvofiqlashtirishga bag‘ishlandi.
Tadbirda TDTga aʼzo barcha besh davlat – O‘zbekiston, Ozarbayjon, Qozog‘iston, Qirg‘iziston va Turkiya prezidentlari ishtirok etdi. Ishtirokchilar orasida tashkilot bosh kotibi Kubanichbek Omuraliyev va kuzatuvchi davlatlar vakillari: Turkmaniston Xalq ьaslahati raisi Gurbanguli Berdimuhamedov va Vengriya bosh vaziri Viktor Orban ham bor edi.
Izoh (0)