Ўзбекистонда “Қуёшли маҳалла” танлови ўтказилади 

Ўзбекистон бўйлаб “Қуёшли хонадон” номли йирик дастур ишга тушмоқда. Бу ҳақда Энергетика вазирлиги ахборот хизмати хабар берди.

Хабарга кўра, Вазирлар Маҳкамасининг 2023 йил 14 мартдаги фармойиши эълон қилинди. Унга асосан 2023 йилда республика ҳудудларида аҳоли хонадонларига кичик қувватли қуёш панелларини ўрнатишни рағбатлантириш бўйича “Қуёшли хонадон” дастури амалга оширилади.

Ушбу дастур асосида мамлакатимиз ҳудудларида 36,6 мингта аҳоли хонадонларида умумий куввати 182,1 МВт бўлган қуёш панелларини ўрнатилади. Шунингдек, дастур доирасида қуёш панелларини ўрнатиш ва ундан фойдаланишни жадаллаштириш ҳамда ушбу ишларни рағбатлантириш мақсадида “Қуёшли маҳалла” танловини ўтказиш кўзда тутилган.

Қайд этилишича, “Қуёшли маҳалла” танловининг бош совриндори электромобил билан тақдирланади. Танлов ғолиблари қуйидаги тартибда мукофотланади:

• республика бўйича бош соврин базавий ҳисоблаш миқдорининг 1200 баравари миқдоригача бўлган қийматдаги электромобил;

Қорақалпоғистон, вилоятлар ва Тошкент шаҳрининг ҳар бири бўйича:

• 1-ўрин БҲМнинг 400 баравари миқдоригача бўлган қийматдаги 10 кВт қувватли қуёш фотоэлектр тизимини ўрнатиб берилади;
• 2-ўрин БҲМнинг 200 баравари миқдоригача бўлган қийматдаги 5 кВт қувватли қуёш фотоэлектр тизимини ўрнатиб берилади;
• 3-ўрин БҲМнинг 100 баравари миқдоригача бўлган қийматдаги 3 кВт қувватли қуёш фотоэлектр тизимини ўрнатиб берилади.

Танлов 2023 йил 15 мартдан 1 июнга қадар ўтказилади. Унда Қорақалпоғистон, вилоятлар ва Тошкент шаҳар, маҳалла (қишлоқ, овул) фуқаролари йиғинлари миқёсида ўтказилади ҳамда 14 та ҳудуднинг ҳар бири бўйича ғолиблар аниқланади.