Ўзбекистонда 1 март ҳолатига кўра, хусусий боғча ва мактаб тўлови учун ота-оналар 17 миллиард сўмдан ортиқ солиқ имтиёзидан фойдаланди. Бу ҳақда Солиқ қўмитаси ахборот хизмати хабар берди.
Хабарга кўра, 1 март ҳолатига фуқаролар 2022 йил учун нодавлат мактабгача таълим ташкилотлари ва мактабларда таълим олиш учун йўналтирган даромадлари бўйича 17,7 миллиард сўм солиқ имтиёзидан фойдаланган. Шундан:
- 9731 нафар фуқаро жами йиллик декларация топшириш орқали 15,3 миллиард сўм даромад солиғи суммасини қайтариб олган;
- 1079 та корхона ва ташкилотларда ишловчи 1698 нафар фуқарога иш берувчи томонидан тўлов манбаида 2,4 миллиард сўмлик даромад солиғидан имтиёз қўлланилган.
Маълумот учун, 2022 йил 1 апрелдан фарзандларига нодавлат мактабгача таълим ташкилотлари ва (ёки) мактаблар кўрсатадиган таълимга оид хизматлар учун ота-она (фарзандликка олувчилар) томонидан ҳар бир фарзанд учун тўланадиган ойига 3 миллион сўмгача бўлган тўловларига йўналтириладиган даромадлари солиқ солинмайдиган даромадлар таркибига киритилган. Унга кўра,
- ота-оналар томонидан нодавлат мактабгача таълим ташкилотлари ва мактабларга тўловларни иш ҳақидан пул ўтказиш йўли билан тўлаган бўлса, солиқ имтиёзи (иш берувчи томонидан) тўлов манбаида қўлланилади;
- 2022 йилда таълим учун тўлов жисмоний шахс томонидан мустақил равишда (нақд пул, банклардаги омонат ва пластик карталардан фойдаланган ҳолда) амалга оширилганда, солиқ чегирмаси солиқ органларига жами йиллик даромадлар тўғрисидаги декларацияни 2023 йилнинг 1 апрелига қадар топшириш йўли орқали берилади.
Изоҳ (0)