Ўзбекистонда 18—19—20 ҳамда 22 март кунлари ДХМ ҳамда ЙҲХБ бўлимларида ҳайдовчилик гувоҳномасини алмаштириш имкони яратилди. Бу ҳақда Адлия вазирлиги ахборот хизмати хабар берди.
2023 йил 31 март куни эски гувоҳномаларни алмаштиришнинг биринчи босқичи якунланиши, 2010 йилгача берилган эски “права”лар ҳақиқий эмас деб ҳисобланиши ва белгиланган муддатда ҳужжатини алмаштирмаганлар сонининг кўплигини ҳисобга олиб, шу қарорга келинган.
Бунинг учун иш графиги меҳнат қонунчилиги доирасида қайта кўриб чиқилган. Бунда, юқорида қайд этилган кунларда давлат хизматлари марказлари ҳамда Ички ишлар бош бошқармаси йўл ҳаракати хавфсизлиги бошқармаси бўлимлари орқали ҳайдовчилар эрталаб соат 9:00 дан кечги соат 18:00 гача хизматдан фойдаланиши мумкин.
2023 йил февралдан бошлаб ҳозирги кунга қадар 5 500 дан ортиқ фуқаро ушбу таклиф этилаётган тартибдан фойдаланган ҳолда эски намунадаги ҳайдовчилик гувоҳномаларини янгисига алмаштирган (почта орқали уйларига етказиб берилган).
Изоҳ (0)