6 март куни Тошкент давлат стоматология институти клиникаси тиббий асбобларни стерилизация қилиш учун ўтказган тендер якунланди. Лот маълумотларига кўра, ғолиб иккита кўрсаткич бўйича жами 5200 та буюмга тозалаш хизматини кўрсатиши керак.
Бошланғич нархи 55 миллион 200 минг сўм бўлган тендерда иккита МЧЖ иштирок этди. Булар:
- The Best Group Bussnis;
- Тошкент тиббиёт академиясининг кўп тармоқли клиникаси.
Шу жойида тахмин қилиб кўринг-чи, тендерни қайси тадбиркорлик субъекти ютган экан?
Бекграунд
Буюртмачи ва рақобатчиларнинг раҳбарияти билан танишсак. Энг аввал тендерни ўтказаётган Тошкент давлат стоматология институти клиникаси. Бу муассаса 100 фоиз Соғлиқни сақлаш вазирлигига тегишли. Раҳбари — Аҳмедов Саидазиз Пўлатович.
Энди. Тендер қатнашчиси бўлган The Best Group Bussines МЧЖнинг ягона таъсисчиси ва раҳбари Жонгиров Маъруф Тошқулович. Бу ерда ҳаммаси жойида.
Гап унинг рақобатчисида. Чунки Тошкент тиббиёт академияси кўп тармоқли клиникасининг очиқ маълумотларига қарасак, унинг ҳам 100 фоиз улуши Соғлиқни сақлаш вазирлигига тегишли эканини кўриш мумкин.
Контекст
Харид комиссияси баённомаси ҳайратланарли натижаларни тақдим этмади. Комиссия аъзолари 97 га 92 баҳолари билан тендер ғолиблигини ТТА кўп тармоқли клиникасига бериб юборган. Шартнома суммаси — 50 миллион сўм.
Яъни ССВга тегишли муассаса очиқ тендер ўтказяпти — ва унда ССВга тегишли бошқа бир МЧЖ ғолиб бўляпти. Классика.
Бу тендер қанчалик адолатли? “Давлат харидлари тўғрисида”ги қонун нормаларига мос келадими? Масъуллардан изоҳ кутиб қоламиз.
Изоҳ (0)