Банклар огоҳлантирилди, тўлов ташкилотидан лицензия қайтариб олинди: Банк назорати қўмитаси январда нималар қилди?

Марказий банкнинг Банк назорати қўмитаси томонидан 2023 йилнинг январь ойи давомида аниқланган қоидабузарлик ҳолатлари бўйича банклар, нобанк микромолия ташкилотлари ва тўлов ташкилотларига нисбатан чоралар кўрилган. Бу ҳақда Марказий банк хабар бермоқда.  

Тематик ўрганишлар натижасида аниқланган камчиликлар юзасидан “Ўзмиллийбанк”, “Микрокредитбанк”, “Aloqabank”, “Turonbank”, “Қишлоққурилишбанк” ва “Асакабанк” огоҳлантирилган: 

• молиявий йўқотишларга қарши захиралар яратилмагани; 
• кредит таваккалчиликларини камайтириш бўйича етарли таҳлиллар олиб борилмагани, 
• муаммога айланиши мумкин бўлган кредитларни эрта аниқламагани; 
• вужудга келиши мумкин бўлган кредит таваккалчиликларини камайтириш бўйича етарли таҳлиллар олиб борилмагани; 
• кредитлар мониторинги, ахборот тизими ва кредит қарздорликларини ундириш ишлари талаб даражасида ташкил этилмагани сабабли.  

Бундан ташқари, иқтисодий санкциялар ва экспортга тақиқлар билан боғлиқ хатарларни бошқаришга доир юклатилган вазифалар ижросини таъминлашда камчиликларга йўл қўйган банклар (“Kapitalbank”, “Anorbank”, “Равнақ банк”) ҳам огоҳлантирилган. 

Cash U микромолия ташкилотига эса “Истеъмолчиларнинг ҳуқуқларини ҳимоя қилиш тўғрисида”ги қонуннинг 4 ва 6-моддаларига амал қилинмаган ҳолда истеъмолчига хизматлар ҳақида ўз вақтида тўғри ва тушунарли маълумот берилмагани ва истеъмолчиларнинг хизмат ҳақида тўғри ва тўлиқ маълумот олиш ҳуқуқи бузилгани сабабли 30 млн сўм жарима қўлланган.

Қонунчиликда белгиланган муддатларда ўз фаолиятини бошламагани учун E-services House масъулияти чекланган жамиятидан тўлов ташкилоти фаолиятини амалга ошириш ҳуқуқини берувчи лицензияси чақириб олинган.