Ўзбекистонда аҳоли томонидан тўловларни амалга оширишда қўшимча қулайликлар яратишга доир президент қарори қабул қилинди. Марказий банк бошқарма бошлиғи Хушвақт Азизов “Дарё” нашрига берган интервьюсида қарорда белгиланган масалаларни таҳлил қилди.
Айрим “комиссия” тўловлари бекор бўлади
Жорий йилнинг 1 майдан бошлаб бенефициари бюджет ва корпоратив буюртмачи ҳисобланган тўловлар бўйича тўлов хизматлари кўрсатганлик учун воситачилик ҳақи (йиғимлар) тўлов шаклидан қатъи назар тўловчи – жисмоний шахсдан эмас, балки тўлов суммасидан чегириб қолиш йўли билан ундирилади. Бунда воситачилик ҳақи миқдори тўлов суммасининг бир фоизигача, бироқ жами суммаси Марказий банк томонидан белгиланадиган чегаравий миқдорлардан кўп бўлмаган миқдорда бўлади.
Айтайлик, мажбурий ижро, бюджет, жарима, давлат хизматлари учун ёки бошқа турдаги тўловларни амалга оширишда аҳолига қулайлик яратилади.
Энди жисмоний шахс 100 сўм тўласа, пули тўлов қабул қилувнинг ҳисобига “комиссия” ушланмаган ҳолда тушади. Яъни воситачилик ҳақи тўловларни қабул қилувчи ҳисобидан қопланади.
Супермаркет кассасидан нақд пул ечиб олиш мумкин бўлади
Биринчи майча Тошкент шаҳрида виртуал касса билан таъминланган кунлик хизмат кўрсатувчи шохобчаларда аҳолини банк карталари орқали нақд пул бериш тизими жорий қилинади. Бу ўз навбатида Марказий банк томонидан чекланадиган сумма миқдорида ёки тадбиркорлик субъектининг кунлик савдо тушуми миқдоридан келиб чиқиб белгиланади. Масалан, сиз супермаркетдан товар харид қиласиз. Ўша товар суммасини чегирганда, сизда кассадан нақд пул олиш имкони пайдо бўлади. Албатта, унга лимит белгиланади. Ҳозирда бу бўйича техник йўриқнома ишлаб чиқиляпти.
Бу қарор билан тадбиркорларга кўпроқ қулайлик яратилади. Масалан, савдо нуқтасисиз тадбиркорлар нақд пул тушумидан инкассация харажати тўлайди. Янги тизим орқали ўша харажатдан иқтисод қилиб, ўзининг фойдасини ошириш мумкин.
Uzcard ва Humo интеграцияси
Қарорга мувофиқ, чекка қишлоқларга ҳам банкоматлар тармоғи етиб бориши ва жойларда аҳолига янада қулайлик яратиш кўзда тутилмоқда.
Жорий йилнинг охиригача терминаллар ҳамда Uzcard ва Humo тўлов тизимларининг инфратузилмаси интеграция қилинади.
Ҳозирда республикадаги банкоматлар сони 12 минг 400 тадан ортиқ. Аҳоли гавжум жойларда 2 тизимли банкоматлар, яъни бир жойда 4 та банкомат туради. Булардан иккитаси Uzcard, иккитаси Humo тўлов тизимига тегишли бўлади. Уларни интеграциялаштириш натижасида жойларга тўртта банкомат эмас, иккита жойлаштирилади. Қолган иккитасини олис ҳудудларга етказиш ва бу орқали аҳолини банкоматдан тўлақонли фойдаланишига имконият яратилади.
“Энди бюджет ходимлари банк ишламаси ҳам ойлик ололади”
Шу пайтгача Иқтисодиёт ва Молия вазирлигининг ғазна ҳисоб рақамларидан тўловларни амалга ошириш имконияти мавжуд эмас эди. Бу қарор билан Марказий банкнинг тезкор тўлов тизимига интеграциялаштириш натижасида тўловларни 24/7 режимида амалга ошириш мумкин. Яъни дам олиш ва байрам кунларида ҳам исталган тўловларни ғазна ҳисоб рақамидан амалга ошириш мумкин бўлади. Бу банк иш кунига тааллуқли бўлмайди. Яъни маблағлар онлайн режимда, тезкорлик билан тўланади.
Масалан, бюджет ташкилот ходимларининг ойлик иш ҳақи байрам кунларига тўғри келадиган бўлса, Молия вазирлигида молиялаштириш имконияти бўлмайди. Чунки байрам ёки дам олиш кунлари банк ишламайди. Шунинг учун тўлов қилиб бўлмайди.
Қарорда кўрсатилганки, 24/7 режимда тезкор тўлов тизимига уланганидан кейин дам олиш кунларими, бошқа кунларими, ойлик иш ҳаққини ўтказиб бериш имконияти яратилади. Айнан “ойнинг охири ёки шанба кунига тўғри келди, байрам кунларига тўғри келди. Банк эртаси куни ишламас экан”, деган муаммолар бўлмайди. Тезкор тўлов тизимига улансангиз, шу куннинг ўзида тўловни амалга ошираверасиз.
Изоҳ (0)