Ёга, сузиш, фитнес: Кейт Миддлтоннинг сарвиқомат бўлишига ёрдам берадиган лайфхаклар

Уэлс маликаси Кейт Миддлтон овқатланиш тартибида маълум чекловларга риоя қилса-да, ўзининг гўзал ва нафислиги учун овқатланишдаги тартиблардан эмас, ёшлигида спортга бўлган иштиёқидан қарздор. Хўш, Кейт қандай машғулотлар ёрдамида бундай натижага эришди? “Новий очаг” нашри унинг гўзаллик сирлари ҳақида маълумот берди.

Теннис

Кейт болалигидан теннисни яхши кўради ва у бу спорт бўйича ўз кўникмаларини йўқотмасликка ҳаракат қилади. Уилям ва Кейт Кембриж герсоги ва герсогиняси сифатида яшаган Норфолкдаги Анмер Холл мулкига кўчиб ўтишидан олдин малика теннис кортини тўлиқ таъмирлашни сўради, кейин эса турмуш ўртоғи ва синглиси Пиппани тер тўкишга мажбур қилди. Иккала кичик Миддлтон ҳам профессионал даражадаги ракеткачилар ҳисобланади. Улар кўп йиллар давомида бир мураббий билан ишлаган, ҳатто у Кейтнинг тўйига бориш шарафига муяссар бўлган.

Сузиш

Бир пайтлар Кейт мактабнинг сузиш бўйича жамоасида бўлган ва Сент-Эндрюс университетига ўқишга киргач, у ерда ҳам ушбу машғулотга қатнашди. Айтганча, бу бир вақтлар Миддлтонни шаҳзода Уилямга яқинлаштирган машғулотлардан бири, уларнинг иккаласи сувни жуда яхши кўришган. Кейт болаларига ҳам сузишни ўргатган – шаҳзода Жорж онаси билан Букингем саройидаги бассейнда мунтазам ушбу машғулот билан шуғулланади. Бундан ташқари, Уэлс маликаси сузиш бўйича мусобақаларни томоша қилишни яхши кўради, у 2012 йилда Лондон Олимпиадасида фаол тарзда иштирок этган.

Ёга

Кейт узоқ вақтдан бери ёга билан шуғулланади. У амалиётни ўтказиб юбормасликка ҳаракат қилади ва ҳатто ҳомиладорлик пайтида ҳам ёга билан шуғулланган. Маълумки, Миддлтон малика Маргаретнинг вилласи жойлашган Мюстик оролидан келган руҳий амалиёт бўйича ўқитувчи билан алоқада бўлган. Ўқитувчи ҳам Кейт ва Уилямнинг тўйига таклиф қилинганлар орасида эди.

Пиёда юриш ва сайр қилиш

Бутун қирол оиласи қишлоқ жойларининг кенг далаларида тоза ҳавода узоқ сайр қилишни яхши кўради. Кейт учун бундай машғулот ҳам оғир эмас, у болалигида доимий равишда оиласи билан пиёда саёҳат қилган ва ити Лупо билан кўп соатлаб юрган. Очиқ ҳаводаги машғулотлар Кейтни бардошли қилди, у Бутан бўйлаб саёҳат пайтида Уилям билан денгиз сатҳидан уч километр баландликда жойлашган “Йўлбарс уяси” монастирига кўплаб зинапоялар орқали кўтарилди.

Чанғида учиш

Қироллик оиласининг кўплаб аъзолари чанғида учиш спорт турини яхши кўради, шу жумладан, Кейт ҳам бундан мустасно эмас. Уэлс маликаси турмуш ўртоғи билан камида йилига бир марта тоққа боради. Жуфтликнинг фарзандлари Жорж ва Шарлотта ҳам катта бўлганидан кейин ота-оналари билан чанғи учиш учун боришга муваффақ бўлди. Бироқ уларда оналаридан ортда қолмасликнинг имкони йўқ, ҳатто шаҳзода Уилям ҳам интервьюда чанғида учиш маҳорати бўйича рафиқаси ундан анча устун эканлигини тан олган.

Фитнес

Илгари Кейт мунтазам равишда спорт залига борган, аммо Уилямга турмушга чиққанидан кейин жамоат жойида машқ қилиш унинг учун тўғри келмайдиган вариантга айланди. Ҳозирда Кейт алоҳида сабоқ олади, у Виндзор майдонларида мураббий билан машқ қилади.

Югуриш

Югуриш Кейт Миддлтоннинг ёшлигида севимли машғулотига айланди. У ва Уилям университетда муносабатда бўлишни бошлаган пайтларида, нонушта олдидан эрталаб югуришни яхши кўришарди. Кетрин очиқ ҳавода машқ қилиш учун ҳозир ҳам жуда эрта туради.

Елканли спорт

Уэлс маликаси болалигида отасидан елканли спорт турини ўрганган, кейинчалик эса Уилям билан Англиянинг жанубий қирғоқларида гастрол сафарларида бу спорт тури билан машқ қилган. Кейт экипаж билан қандай мулоқот қилишни ва яхтани бошқариш кераклигини билади. У ҳатто Янги Зеландияга иш сафари пайтида турмуш ўртоғи билан пойга уюштириб, ғалаба қозонган.

Эшкак эшиш

Кейт Миддлтон ўзини синаб кўрган яна бир спорт тури — эшкак эшиш эди. У ёшлигида жамоа билан бу спорт тури билан шуғулланган ва ҳатто Ла-Манш бўйлаб сузишда қатнашишга тайёр бўлган. У кейинчалик буни рад этди, воқеага оилавий адвокатлар ва шаҳзода Уилямнинг яқинлари қаршилик кўрсатди, улар пойга маликага ортиқча эътиборни жалб қилишини ва сувда камералари бўлган фотосуратчиларнинг мавжудлиги бутун гуруҳнинг хавфсизлигига таҳдид солиши мумкин деб ҳисоблашди. Шундан сўнг Кейт фақат сарой симуляторларида эшкак эшиш билан шуғулланган.

Чим устида хоккей

Кейт ўрта мактабни тугатгач, чим устида хоккей ўйнаш спорт тури билан шуғулланишни тўхтатди. Бироқ 2013 йилда, ўқув муассасасига ташриф буюрганида, Кембриж герсогиняси яна қўлига хоккей таёғини олиб, талабалар билан хоккей ўйнади. Кейт узун палто, ноқулай баланд пошнали поябзал ва ҳомиладорлигидан хижолат тортмади.