Ўзбекистон ва Озарбайжон ўртасида ўзаро товар айирбошлаш ҳажмини бир миллиард долларга етказиш кутилмоқда. Бу ҳақда Инвестициялар, саноат ва савдо вазирлиги ахборот хизмати хабар берди.
Хабарга кўра, Ўзбекистон инвестициялар, саноат ва савдо вазири Лазиз Қудратов мамлакатда ташриф билан бўлиб турган Озарбайжон иқтисодиёт вазири Микаил Жабборов билан 24 февраль куни учрашди. Учрашувда икки давлатнинг тегишли вазирликлари ва идоралари раҳбарлари ҳам иштирок этди. Мулоқот вақтида 2022 йилда 53 фоизга ўсган ўзаро товар айирбошлаш ҳажмини ошириш истиқболлари муҳокама қилинди. Кўзланган мақсад — кўрсаткичларни 1 миллиард долларга етказиш. Бунга, жумладан, нефть-кимё маҳсулотлари, руда ва концентратлар, алюминий, озиқ-овқат маҳсулотлари, механик ва электротехника ускуналари, тўқимачилик ва фармацевтика маҳсулотлари етказиб беришни кўпайтириш ҳисобига эришиш режалаштирилган.
Мева-сабзавот, озиқ-овқат, тўқимачилик, чарм-поябзал маҳсулотлари етказиб беришни ташкил этиш, шунингдек, икки давлатнинг йирик шаҳарларида мунтазам савдо ва ишбилармонлик миссиялари, миллий маҳсулотлар кўргазмаларини ўтказиш бўйича келишувга эришилди. Аниқ лойиҳавий ташаббуслар мисолида икки мамлакат ўртасида саноат кооперациясини кенгайтириш имкониятлари кўриб чиқилди. Лойиҳаларни ишлаб чиқишга тизимли ёндашиш, яъни, рақобатдош устунликларни ҳисобга олиш ва уларни биргаликда молиялаштиришга мўлжалланган Ўзбекистон—Озарбайжон инвестиция жамғармаси фаолияти ташкил этилиши кутилмоқда. Автомобильсозлик, пахтачилик ва тўқимачилик маҳсулотлари ишлаб чиқариш, ипакчилик ва бошқа соҳалар ҳамкорликнинг энг истиқболли йўналишлари сифатида таърифланди.
Худди шу тартибда транспорт ва логистика соҳасида ҳам қатор лойиҳаларни амалга ошириш имкониятлари ўрганилди. Темирйўл орқали юк ташиш ва транзитни кўпайтиришга қаратилган рағбатлантирувчи чораларни кўришга келишиб олинди. Томонлар, шунингдек, Ўзбекистон ва Озарбайжон ҳудудлари биринчи форуми ва унинг доирасида Ишбилармонлар кенгашининг учинчи йиғилиши ўтказилишини олқишладилар. Очиқ ва конструктив руҳда имзоланиши режалаштирилган ҳужжатлар ижросининг амалий жиҳатлари таҳлил қилинди.
Шунингдек, учрашув якунлари бўйича Озарбайжон билан стратегик шерикликни янада ривожлантириш ва мустаҳкамлашга тайёрлик билдирилди ва эришилган келишувларни амалга ошириш бўйича аниқ чора-тадбирларни ўз ичига олган “йўл харитаси”ни тасдиқлашга келишилди.
Изоҳ (0)