“2007 йилда запретга тушдим, бу ҳолатдан қаттиқ сиқилиб, семириб кетдим”. Феруза Жуманиёзова фаолиятидаги оғир дамлар, ижодни бошлаган йилларидаги қийинчиликлар ҳақида (видео)

Хонанда Феруза Жуманиёзова “запрет”га тушгани, ҳаётидаги оғир дамлар, ижодни бошлаган йилларидаги қийинчиликлар ва туҳматлар ҳақида гапириб берди.

“Кўп жойларга бордик, бироқ бу саволларга жавоб топа олмадим”

 2007 йилда “запрет”га тушдим. “Халқлар дўстлиги” санъат саройида концерт бераётгандим. Афишалар чиққан, рекламалар берилганди. Концерт тўхтатилди, деб афишаларни олиб ташлашган. Ким тўхтатяпти, нима сабабдан қиляпти, билмаганман. Биринчи стрессни ўшанда олганман. Орадан етти йил ўтса-да, лицензиядан дарак бўлмади, “запрет” очилмади. Кўп жойларга бордик, бироқ бу саволларга жавоб топа олмадим. Ижодкорга “запрет” қўйиб бўлмайди, унга “запрет” қўйилса, бўлди, ўлди дегани бўлади.

Балки ўша сиқилишдан семириб кетгандирман, чунки бу нарса миямга, юрагимга ўрнашиб қолди. Саҳнага чиқишим учун кўп йиллар керак бўлди. Мухлислар ҳар сафар мени кўрганида, қачон санъатга қайтасиз, деб сўрарди. Мен бунга жавоб топа олмас эдим, чунки миям бу саволга жавоб беришимга йўл бермас эди. Ўзим қатори чиққан санъаткорлар концерт бераётганини телевизорда кўрсам, ичим ёниб кетарди, бу бахиллик эмас. Буни ижодкор бўлган инсон билади. Ўша пайтда болалик қилиб қўйган пайтларим бўлган, афсус қилдим, лекин афсус билан ҳеч нарсани ортга қайтариб бўлмайди.

“Фарзанди борми, турмуш ўртоғи борми, ўша энг бахтли аёл”

Энг бахтли аёл — оиласи билан бирга яшаган, оиласини тутиб қолган аёл. Гарчи пули бўлмаса ҳам, ҳашаматли уйи, машинаси бўлмасин, майли, фарзанди борми, турмуш ўртоғи борми, ўша энг бахтли аёл.

“Қийинчиликлар Тошкентга келганимдан кейин бошланди”

Ҳалигача эсимда, Тошкентга ойим билан автобуснинг бир ўриндиғида келганмиз. Ойимнинг олдида ҳарбий хизматдан келган аскар ўтирган, шунда ойим ундан: “Қизим сенинг олдингда ўтириб турса майлими”, — деб сўраган. Автобуснинг иккита ўриндиғидан жой сотиб олишга пулимиз бўлмаган. Ҳалиги бола хизматдан чарчаб келаётганини айтган. Шунақа қийинчиликлардан ўтганмиз.

Қийинчиликлар Тошкентга келганимдан кейин бошланди. Онамга: “Қизинг турмуш ўртоғим билан юрибди”, — деб туҳмат қилишган. Бу онамга қаттиқ таъсир қилган. Ҳар бир она қандай фарзандни боқаётганини ўзи яхши билади. Мен унчалик фарқига бормаганман, чунки ёш бўлганман. Ҳозир ўзим она бўлиб, онамдан ўтган нарсаларни, қандай қийин бўлганини ўйлаб ўтирибман.