Ўзбекистоннинг яна икки ҳудуди: Қарши ва Тошкент шаҳрида БАА инвесторлари томонидан аёллар ва болалар клиникалари қурилади. Бу ҳақда Инвестициялар, саноат ва савдо вазирлиги ахборот хизмати хабар берди.
Хабарга кўра, 15 февраль куни Ўзбекистон ишчи гуруҳи Бирлашган Араб Амирликларида ташрифининг иккинчи куни инвестициялар, саноат ва савдо вазири Лазиз Кудратов БАА саноат ва илғор технологиялар вазири – Masdar компанияси бошқаруви раиси Султон Аҳмад ал-Жобир ва ушбу мамлакатнинг бир қатор етакчи компаниялари раҳбарлари билан учрашувлар ўтказди. Кун тартибидан инвестициявий ҳамкорлик йўналишларини кенгайтириш ва иқтисодиётнинг устувор тармоқларида янги йирик лойиҳаларни биргаликда амалга ошириш масалалари ўрин олди. Султон Аҳмад ал-Жобир билан кимё саноати, металлургия ва геология-қидирув соҳаларида жорий лойиҳаларни амалга оширишнинг бориши ва янги сармоявий ташаббусларни амалга ошириш режалари муҳокама қилинди.
“Халифа бин Зоид ал-Наҳаян” жамғармаси бош директори Муҳаммад Ҳожи ал-Хурий билан учрашувда Нукус шаҳрида аёллар ва болалар клиникасини қуриш лойиҳаси амалга оширилаётгани таъкидланди. Қарши ва Тошкент шаҳарларида ҳам шундай шифохоналар қуриш истиқболлари, шунингдек, Ўзбекистонда янги туғилган чақалоқларни эшитиш қобилиятини текширишнинг универсал тизимини жорий этиш масалалари кўриб чиқилди.
Шунингдек, International Holding Company бош ижрочи директори Саед Басар Шуeб билан Ўзбекистоннинг соғлиқни сақлаш, энергетика ва бошқа тармоқларида қўшма лойиҳаларни амалга ошириш масалалари муҳокама қилинди. Томонлар мамлакат инвестициявий салоҳияти билан яқиндан танишиш, қўшма ташаббусларни амалга ошириш бўйича аниқ шартномалар тузиш мақсадида компания раҳбарияти ва экспертларининг Ўзбекистонга ташрифини ташкил этишга келишиб олди.
АDSSC бош директори А.Шамси билан учрашувда асосий эътибор Тошкент шаҳридаги оқава сув тизимини DXSh тамойиллари асосида такомиллаштириш лойиҳасини амалга оширишга қаратилди. Лойиҳа доирасида замонавий муҳандислик иншоотларини қуриш назарда тутилган. Тегишли инвестиция таклифи лойиҳаси 2023 йилнинг баҳорида имзоланиши режалаштирилган.
РАК Ceramics компанияси ижрочи директори А.Массад билан учрашувда Ўзбекистоннинг қурилиш материаллари ишлаб чиқариш йўналишидаги саноат салоҳияти атрофлича кўриб чиқилди. Экспортга мўлжалланган маҳсулотлар, хусусан, кафель ва кулолчилик маҳсулотлари ишлаб чиқариш лойиҳаси устида иш бошлаш бўйича келишувга эришилди.
Учрашувлар иштирокчиларга манфаатлар кесишуви нуқталарини аниқлаш ҳамда истиқболли инвестиция лойиҳаларини амалга ошириш, ижтимоий инфратузилмани яхшилаш ва янги иш ўринлари яратиш каби амалий натижаларга эътибор қаратган ҳолда ҳамкорликни ривожлантириш режаларини белгилаш имконини берди.
Изоҳ (0)