Атамбаев 2010 йилги Ўш воқеалари бўйича судга тез ёрдам машинасида олиб келинди (видео)

Қирғизистоннинг собиқ президенти Алмазбек Атамбаев 1 декабрь куни тез ёрдам машинасида судга олиб келинди. Бу ҳақда “Zakon.kz” хабар берди.

Маълум қилинишича, собиқ давлат раҳбари ҳарбий хизматчилар ҳамроҳлигида Первомайский туман судига 2010 йил Ўш воқеалари бўйича келган. Атамбаевга нисбатан Қирғизистон Жиноят кодексининг 337-моддаси «Хизмат ваколатини суиистеъмол қилиш» бўйича тергов ҳаракатлари олиб борилмоқда.

16 июнь куни суд икки жиноий иш бўйича Алмазбек Атамбаевни оқлаган. Унда собиқ президент Туркия фуқароларига ноқонуний паспорт бериш ва мансаб ваколатини суиистеъмол қилишда айбланганди.

Суд мажлисида Атамбаев бу «циркда» қатнашишни хоҳламаслиги, соғлиғи ҳам бунга йўл қўймаслигини айтган. У тартибни бузишга мажбурлигини таъкидлаб, суд залидан уни олиб чиқишни сўраган ва кабина ойнасини тепган.Судья Атамбаевга мурожаат қилган. Бироқ унинг адвокати Сергей Слесарев Қирғизистон собиқ раҳбари саволларга жавоб бермаслиги ва судда кўрсатма бермаслигини айтган. Шундан кейин Атамбаевнинг ўзи нутқ сўзлаган.

Атамбаев тарафдорларининг ҳайқириқлари остида суд залидан олиб кетилган. Собиқ президент бошқа суд мажлисларида ҳам шундай қилган.

2010 йил 10 июнда Қирғизистон жанубидаги Ўш шаҳрида қирғиз ва ўзбек этник гуруҳлари ўртасида тўқнашув бўлган. Расмий маълумотларга кўра, 442 та ўлим қайд этилган, бироқ ОАВ ҳалок бўлганлар сони 2 000 дан ортиқ бўлиши мумкинлигини хабар берган.