Variety нашри “Уэнздей” сериалида бош ролни ижро этган актриса Женна Ортеганинг машҳур лойиҳадан олган тажрибалари ҳақидаги мақолани эълон қилди.
Ортеганинг сўзларига кўра, сериалда Уэнздей билан боғлиқ саҳналар кўп бўлганлиги боис, у деярли ҳамма вақтини суратга олиш майдончасида ўтказган. Шунингдек, у персонаж бажарадиган кўпгина ҳаракатларни мустақил равишда бажаришни хоҳлаган. Актриса бунинг учун қиличбозлик, немис тили, эшкак эшиш ва виолончель чалишни ўрганиши керак эди.
“Мен суратга олиш майдочасига икки соат олдин борардим, кунига 12-14 соат ишлардим. Кейин уйга бориб, Zoom орқали ўзим учун керакли бўлган дарсларни ўрганардим. Ёки уйга келганимда виолончель чалишни ўргатадиган ўқитувчи мени кутаётган бўларди. Бу доимий оддий дарслар эди ва агар биз ҳафтанинг олтинчи куни суратга олиш жараёнларида иштирок этмасак, у кун ҳам дарсларга бағишланарди”, — дейди Ортега.
Актриса лойиҳани томоша қилган виолончелчиларни ҳафсаласини пир қилиш ниятида эмаслигини айтди. Шунинг учун у каскадёрлар ёки унинг ўрнини боса оладиган бошқа мутахассислар ёрдамидан фойдаланишни хоҳламади. Ортеганинг айтишича, у учун сериалнинг энг қийин қисми Paint in Black композициясини чалгани бўлган.
“Етарлича ухламас эдим. Сочларимни юла бошладим. FaceTime қўнғироқлари шунчалик кўп эдики, мен жазавага тушиб йиғлаганимда отам уларга жавоб берарди”, — дейди Женна Ортега.
Бироқ лойиҳа муаллифлари дублёрлар ва каскадёрлар ёрдамига мурожаат қилишга мажбур бўлган. Гап шундаки, суратга олиш ишлари тугагач, график янада тиғизлашди, бу эса кўп вақт билан боғлиқ чекловларга сабаб бўлди. Шу сабабга кўра, актриса коронавирус билан касалланган ҳолатда, машҳур рақсни ижро этишига тўғри келди.
Актриса иккинчи мавсумда қандай воқеалар содир бўлишини билмаслигини айтди. Бироқ Женна сериалнинг сценарий ёзувчилари билан суҳбатлашди ва уларда “кўп қизиқарли ғоялар” борлигини билди. Шунингдек Ортега улардан “оқлаш қийин бўлган” севги учбурчаги ва бошқа элементларга эмас, Уэнздей ва унинг Невермор академиясидаги тажрибасига эътибор қаратишларини сўради.
Изоҳ (0)