Айни вақтда президент Шавкат Мирзиёев Жиззах шаҳрида саноатни ривожлантириш ва қайта тикланувчи энергия манбалари масалаларида йиғилиш ўтказмоқда. Бу ҳақда “Дарё” мухбири хабар берди.
Давлат раҳбари ўз нутқи аввалида инсонларга ислоҳотлар бугун керак эканлигини таъкидлади.
“Ҳозир муқобил энергия бўйича ишни жадал давом эттиряпмиз. Келгуси қишга яхшилаб тайёргарлик кўриш, мактаб, боғча, олий таълим муассасалари совуқ сабаб ёпилмаслиги учун “нималар қилиш керак?” деган саволга жавоб топиш лозим. Қаерга борсам ҳамиша иккита масалани кўтараман: таълим ва тиббиёт. Ўтган 5 йилда икки соҳа бўйича ҳам катта ишларни қилдик, лекин ҳали амалга оширилиши керак бўлган режалар талайгина”, — деди Шавкат Мирзиёев.
Жиззах вилоятида Қозон университетининг филиали бор. Давлат раҳбари ушбу университет қошида тиббиёт ўқув муассасаси очилиши ҳақида гапирди.
“Бугун Қозон давлат университетининг вакиллари билан гаплашдим. У ерда таълим бераётган ўқитувчилар анчагина тажрибали. Бу ерда гаплашганимда уларнинг вакиллари, “Ҳурматли президент, рухсат берсангиз, Жиззахга энди Қозондан кучли мутахассисларни олиб келиб, университетнинг Жиззах филиали қошида битта шифохона ва тиббиёт ўқув муассасасини очсак, нима дейсиз?”, деб сўради. Уларга ҳозирги йиғилишда фаоллар билан маслаҳат қиламан буни, деб айтдим”, — дейди давлат раҳбари.
Изоҳ (0)