Фоторепортаж: Президент ташрифига тайёргарлик кўраётган Наманган

Наманган вилоятида давлат раҳбарининг ҳудудга ташрифига астойдил тайёргарлик кўрилмоқда. Бу ҳақда “Дарё” мухбири Азизбек Абдувалиев хабар берди.

Тайёргарликни биринчи галда марказий кўчаларда сезиш мумкин. Ҳудуд қор ва муздан тозаланган, дов-дарахтлар бутланиб, оқланмоқда.

Йўлларнинг ўйдим-чуқур қисмлари текисланиб, асфалт босилмоқда. Йўл четидаги майдонларнинг тупроғи ағдарилиб, бир текис кўринишга келтирилган.

Шунингдек, асосий йўналишдаги манзилларга давлат байроқлари ўрнатилиб, янги йўл чизиқлари тортилмоқда.

Шу кунларда ободонлаштириш корхонаси ходимлари ва гулчиларнинг қўли-қўлига тегмаяпти. Улар кўча ва хиёбонларга совуққа чидамли, кўркам гул кўчатларини экиш билан овора.

Энг асосийси, ташрифга тайёргарликни аҳоли бевосита сезмоқда: электр ва газ таъминоти сезиларли даражада яхшиланган.

Маълумот учун, Шавкат Мирзиёев ҳафта якунида Наманганга келиши ва мазкур ташриф давомида кичик саноат зоналари, янги ишга туширилган корхоналар билан танишиши кутилмоқда.