Айни вақтда президент Шавкат Мирзиёев Фарғона вилоятининг Қўштепа туманида республика пахта-тўқимачилик кластерлари раҳбарлари билан мулоқот қилмоқда. Бу ҳақда “Дарё” мухбири хабар берди.
Давлат раҳбари кластерларнинг экспортдаги улуши Наманганда бор-йўғи 28 фоизни (117 миллион доллар), Андижонда – 31 фоизни (176 миллион доллар) ташкил қилишини айтди.
“Бу кўрсаткич Фарғонада 50 фоиздан ошган (213 миллион доллар). Яқинда текстиль корхоналарига экспортни кенгайтириш, уларнинг айланма маблағини кўпайтариш, қувватларни кенгайтириш учун, қўшимча 300 миллион доллар ажратдик. Шундан, водий корхоналарига 100 миллион доллар айланма маблағ учун, 20 миллион доллар ишлаб чиқаришни кенгайтиришга берилади.
Шу билан бирга, Қишлоқ хўжалиги вазири Азиз Воитов водийдаги кластер ва фермерларни қўллаб-қувватлаш, ҳосилдорликни ошириш, техникалар олиб беришга яна 100 миллион доллар қўшимча маблағ жалб қилиш бўйича топшириқ олган.
Умуман, водийда тўқимачилик маҳсулотлари экспортини жорий йил камида 2,5 миллиард долларга етказиш бўйича етарли захира бор. Водий кластерлари бу марраларни уддалаб, қолган ҳудудлар учун намуна бўлишларига ишончим комил”, — деди президент.
Изоҳ (0)