Украина томонидан урушда қатнашган Колумбиянинг икки кўнгилли фуқароси 18 январь кунги жангда ҳалок бўлди, деб хабар бермоқда Колумбия Ташқи ишлар вазирлиги матбуот хизмати.
“Икки нафар Колумбия фуқароси декабрь ойидан бери Украинада бўлиб, Украина армиясининг 49-пиёда батальонида хизмат қилган”, — дейилади хабарда. Ҳарбийларнинг исм-фамилиялари кўрсатилмаган.
Колумбиянинг Польша ва Украинадаги элчихонаси ходимлари қурбонларнинг рафиқалари билан боғланиб, жасадларни ватанга қайтариш жараёни бошлангани ҳақида хабардор қилган. Ҳалок бўлган аскарларнинг оилалари уларнинг ўлимини тасдиқловчи фотографик далиллар олишни истаётганини айтган.
Аввалроқ Соледар яқинида Украина томонидан жанговар ҳаракатларда қатнашган икки нафар Британия фуқароси, 28 ёшли Крис Перри ва 47 ёшли Эндрю Бегшоу ҳалок бўлганди. Перри аввалига Северодонецкдан аҳолини эвакуация қилишда иштирок этган, кейин Лиманнинг шарқида ишлаган, Бегшоу эса гуманитар ёрдам етказишда қатнашган.
Sky News маълумотларига кўра, икки британиялик 7 январь куни Соледар йўналишидаги жанглар вақтида бедарак йўқолган, улар “Соледардан гуманитар эвакуация қилишга уриниш пайтида” ҳалок бўлган. Британияликлардан бирининг оиласи маълум қилишича, Перри ва Бегшоу кетаётган машинага артиллерия снарядлари тушган.
Изоҳ (0)