Ғарб давлатлари Киевга танклар етказиб берилиши ҳақида эълон қилгач, Украина президенти Владимир Зеленский мамлакат улардан узоқ масофага учувчи ракеталар ва жанговар самолётлар ҳам олиши кераклигини айтди.

“Бугун (25 январь) НАТО бош котиби Йенс Столтенберг билан гаплашдим. Украина учун узоқ масофага учувчи ракеталар етказиб бериш йўлагини ҳам очишимиз керак, муҳими — артиллерия соҳасида ҳамкорликни кенгайтиришимиз зарур, Украина учун таъминотга самолётларни ҳам киритишимиз керак. Бу орзумиз, бу вазифамиз”, — деди у Telegram каналида эълон қилинган видеомурожаатда.

Олдинроқ Зеленский Столтенберг билан Украина учун янги турдаги қуроллар етказиб беришда тўсиқларни олиб ташлаш масаласини муҳокама қилганини айтганди.

25 январь куни АҚШ ҳукумати Киевга 31 та М1 Abrams танкларини топширишини маълум қилди. Ўз навбатида, Германия ҳукумати ҳам Украинага Германия қуролли кучлари захирасидан 14 та Leopard 2 танкини жўнатиши ва бошқа давлатларга реэкспорт учун рухсат беришини тасдиқлади. Шу куни Норвегия ва Словакия Мудофаа вазирлиги ҳам танкларни Украинага ўтказиш нияти борлигини маълум қилди. Аввалроқ Киевни танклар билан таъминлаш қарори Буюк Британия, Франция ва Польша расмийлари томонидан эълон қилинганди.