Грузия собиқ президенти Михаил Саакашвилининг онаси Гиули Аласания Тбилисидаги «Вивамед» клиникасига ташриф буюрганидан кейин ўғлининг аҳволи ҳақида маълум қилди.
«Ҳалокатли аҳволда, қуруқ суяклари қолган. Қовурғалари бўртиб, ошқозони йўқолиб кетган, умуртқалари кўриниб турибди. Қон қуйишмоқда, аммо у кундан кунга оғирлашиб боряпти, қандай даволаш мумкин?» — деди у.
Гиули Аласания ўғли 23 январь куни бўлиб ўтадиган судда қатнаша олмаслигини айтди.
«У суд мажлисида иштирок этиш тугул, ёрдамчи воситаларсиз ҳаракатлана олмайди. Шунчалик кучдан қолганидан, ҳатто бу воситалар билан ҳам юра олмаяпти», — деди Аласания.
Михаил Саакашвили Грузияда мансаб ваколатини суиистеъмол қилганликда айбланиб, олти йилга озодликдан маҳрум этилганди. Қамоқда у бир неча марта очлик эълон қилди. Май ойидан бери Саакашвили Тбилисидаги элита «Вивамед» клиникасида ётибди.
Декабрь ойида америкалик токсиколог Дэвид Смит Тбилиси судида кўрсатма бериб, Саакашвили оғир металлар билан заҳарланганини маълум қилганди. Мутахассиснинг айтишича, мия, хусусан, ундаги оқ модданинг шикастланиши Грузия собиқ президентида прогрессив деменсияга олиб келган.
Аввалроқ Украина президенти Владимир Зеленский Грузия ҳукуматини Саакашвилининг даволаниши учун уни Украинага, исталган Европа давлати ёки Америкага юборишга чақирган.
Изоҳ (0)