Россиянинг Azur Air авиакомпаниясининг Москвадан Гоага учаётган авиарейси ҳаво кемасига мина жойлаштирилгани ҳақидаги хабарлар туфайли, Ўзбекистонга қайта йўналтирилди, деб ёзади «ТАСС» Ҳиндистон Фуқаролик авиацияси вазирлигига таяниб.
Идорада маълум қилишларича, самолёт бортида 240 киши бор. Ани агентлиги Гоа аэропортидаги манбасига таяниб хабар беришича, самолётда 238 нафар йўловчи (улар орасида 2 нафар чақалоқ бор) ва етти нафар экипаж аъзоси бор.
Бу Azur Air компаниясининг Москва — Гоа йўналишидаги рейсига мина жойлаштирилгани ҳақида хабар келиб тушиши билан боғлиқ сўнгги бир ой ичидаги иккинчи ҳолатдир. 9 январь куни Москвадан Гоага учаётган Azur Air самолёти мина ҳақидаги хабарлар туфайли Ҳиндистоннинг Гужарат штатига қўнганди. Борт кўздан кечирилганида портловчи моддалар ва шубҳали буюмлар топилмаган.
Эслатиб ўтамиз, 13 январь куни Россиянинг Москва — Бангкок йўналишидаги рейсни амалга ошираётган «Аэрофлот» авиакомпанияси самолёти шошилинч равишда Самарқандга қўнган, бунга ҳомиладор аёлнинг саломатлиги ёмонлашгани, шунингдек, бортда юзага келган жанжал сабаб бўлган эди.
18 январь куни эса «Аэрофлот» компанияси самолёти Москвадан Гоага учаётган вақтида Урганчга қўндирилди. АФЛ236 йўловчи рейси Гоа йўналиши бўйича учаётган вақтда маст ҳолатда зўравонлик қилган йўловчи сабаб Урганч халқаро аэропортидаги муқобил аэродромга келиб қўнган.
Мавзуга доир: Тошкентдан Олмаотага учаётган самолёт кучли ҳаво гирдобига тушиб қолди
Изоҳ (0)