Қозоғистон Миллий илмий кардиожарроҳлик марказининг жарроҳлик директори Юрий Пя биринчи президент Нурсултон Назарбоевда ўтказилган жарроҳлик операцияси ва сиёсатчининг саломатлиги ҳақида маълумот берди. Бу ҳақда “Zakon.kz” хабар берди.
Маълум қилинишича, элбошида ўтказилган операция аслида 2022 йилда ўтказилиши режалаштирилган, кардиохирург нима учун жарроҳлик амалиёти кечиктирилганини изоҳлади.
«У банд бўлгани учун операцияни ўзига қулай бўлган вақтда ўтказишга қарор қилдик. Жарроҳлик амалиётини бугун, 20 январда ўтказишга келишдик. Тиббий саволлар бор, бу беморнинг ўзигагина тегишли. Ҳар ким маълумотни ошкор қилмаслик ҳуқуқига эга. Лекин бу фавқулодда шахс экан, баъзи саволларга жавоб беришимиз мумкин. Бугунги операция олдиндан режалаштирилганди», — деди Юрий Пя.
Кардиохирург жарроҳлик амалиёти муваффақиятли ўтганини ҳам қайд этди.
«Фахрланишга арзирли нарса бор. Мамлакатимиз тиббиётига нафақат фуқаролар, балки мамлакат раҳбарияти орасида ҳам ишонч бор. Мен ҳар бир беморга энг яқин одам сифатида қарайман. Ҳар бир операциядан олдин доимо хавотирда бўламан», — деди у.
Шифокорга кўра, Қозоғистон биринчи президентининг аҳволи ҳозирда қониқарли.
«Яқин кунларда Нурсултон Назарбоевга жавоб берилади. Операция 2,5 соатга яқин давом этди. Бу операция эмас, балки процедура. Диагностика ва даволаш муолажаси амалга оширилди», — таъкидлади кардиохирург.
Юрий Пя Назарбоев билан бўлиб ўтган суҳбат тафсилотлари билан ҳам ўртоқлашди.
«Бир марта у билан гаплашганимизда, мен космосга учишни хоҳлашимни айтдим, лекин у билан бирга учишни хоҳлайман, чунки унинг юраги шунчалик каттаки, Назарбоев коинотга учолади», — дейди у ва президент ҳозир ҳушида эканлигини айтди.
«У билан коинотга учиш режалаштирилган вақт ва сана масаласини муҳокама қилдик», — деди Юрий Пя.
Назарбоевнинг соғлиғидаги муаммолар
2021 йил охирроғида Нурсултон Назарбоев умуртқасини операция қилдиргани давлат раҳбари лавозимидан кетишининг сабабларидан бири эканини тан олганди. Назарбоев соғлиғи билан боғлиқ муаммолар катта оммавий тадбир вақтида 2011 йилда кузатила бошлаган. Қозоғистон биринчи президенти 1940 йил 6 июль куни туғилган бўлиб, айни пайтда 82 ёшда.
Изоҳ (0)