Футбол бўйича ўртоқлик ўйинида «ПСЖ» 19 январь, пайшанба куни Саудия Арабистонининг «Ал-Ҳилол» ва «Ан-Насср» клублари юлдузларидан иборат жамоага қарши майдонга тушади.
Ар-Риёдда бўлиб ўтадиган ўйинда Саудия Арабистони жамоалари сафида Криштиану Роналду ҳам иштирок этиши кутилмоқда.
Саудиялик тадбиркор, AqarOne кўчмас мулк гуруҳи бош директори, Мушреф ал-Гамди ўйин учун кимошди савдосига қўйилган вип-чиптани ютиб олди.
Савдо 1 миллион риёлдан (Саудия Арабистони пули) бошланган эди. Ал-Гамди 10 миллион риёлга (2,6 миллион доллар) чиптани қўлга киритди.
Ушбу чипта соҳиби кийим алмаштириш хонасига кириб, футболчилар билан суратга тушиш имкониятига эга бўлди.
Кимошди савдосидан тушган пуллар хайрияга ишлатилади.
Лионель Месси ва Криштиану Роналду 2020 йил декабрь ойидан буён бир-бирига қарши майдонга тушмаган эди. Ўшанда «Ювентус» Чемпионлар Лигасидан ўрин олган ўйинда «Барселона»ни 3:0 ҳисобида мағлуб этганди. Роналду ушбу учрашувда дубль қайд этган.
Изоҳ (0)