Ўзбекистонда 2022 йилда 102 тизими Call-марказларига 2 миллион 864 минг 778 та қўнғироқ бўлди. Бу ҳақда ИИВ ахборот хизмати хабар берди.
Қайд этилишича, янги Call-марказлар 2020 йил сентябр ойидан 2021 йил якунига қадар уч босқичда ишга туширилган. 2022 йил якуни бўйича 102 Call-маркази томонидан қабул қилинган қўнғироқлар сони – 2 миллион 864 минг 778 тани ташкил этган.
102 тизими замонавий ахборот-коммуникация технологиялари ва геоахборот тизимлари билан жиҳозланган. Тизим ягона кластер ва платформага бирлаштирилган. Ахборот хавфсизлиги таъминланган бўлиб, домен назорат тизими билан дастурий-техник ҳимояланган.
Тизимга нафақат ҳуқуқбузарлик ва жиноятлар, балки кўмакка муҳтож шахслар, хусусан, қариялар ҳам қўнғироқ қилиб туради. Бундай вазиятда хабарлар манзил бўйича профилактика инспекторларига етказилади ва зарурий ёрдам амалга оширилади.