Россия мудофаа вазири Сергей Шойгу «махсус ҳарбий операция олиб борилаётган зона»да «Восток» қўшин гуруҳи штабини кўздан кечирди. Бу ҳақда муассаса матбуот хизмати хабар берди.
Пресс-релизга кўра, қўмондонлик пунктида Шойгу гуруҳ қўмондони генерал-лейтенант Рустам Мудоров ҳамда бирлашмалар ва қўшилмалар қўмондонлари маърузаларини тинглаган.
Мудофаа вазирлиги хабар беришича, Шойгу назоратдан ўтказиш чоғида «қўшинларнинг ҳар томонлама таъминланишини ташкиллаштиришга, ҳарбий-муҳандислик ишларини ташкиллаштиришга ва дала шароитида шахсий таркибни хавфсиз жойлаштириш учун шароитлар яратишга, шунингдек, тиббий ва фронторти бўлинмалари фаолиятига алоҳида эътибор қаратган».
Бундан ташқари, вазир ҳарбий хизматчиларга давлат мукофотларини топширган.
Россия Мудофаа вазирлигига кўра, Сергей Шойгу сўнгги бир ой ичида жанговар ҳаракатлар зонасига икки марта ташриф буюрган. Биринчи марта бу ҳақда 2022 йил 18 декабрь куни хабар берилганди. Ўшанда, идора баёнотига кўра, вазир россиялик ҳарбийларнинг «олд позициялари»ни кўздан кечирган, бироқ фаоллар эълон қилинган видеони таҳлил қилиб, Шойгу фронтдан 80 километр узоқликда бўлган, деган хулосага келган.
Ундан кейин Россия Мудофаа вазирлиги Шойгунинг «махсус ҳарбий операция зонасига» ташрифи ҳақида 22 декабрда маълум қилган ва вазир «шахсий таркиб ва ҳарбий техника жойлаштирилган шароитлар билан танишгани» ҳақида ёзган.
Изоҳ (0)