Шарф ҳам муҳим, ҳам бир қарашда кўринмас аксессуар бўлиб, аслида ҳар қандай образни тўлдириши ёки бузиши мумкин. Marie Claire нашри аёллар шарф танлашда мунтазам равишда йўл қўядиган хатоларни санаб ўтди.
Қалин ипдан тўқилган тайёр айлана шаклидаги шарфлар иссиқ бўлиши мумкин, аммо у бўйинни визуал равишда қисқа қилиб кўрсатади. Агар ушбу дизайндаги шарфлар маъқул келса, шунчаки уларни ингичка ипдан тўқилганларини танлаш тавсия этилади.
Жуда ингичка ва юпқа шарфлар ҳам деярли образни тўлдирмайди. Қалинлиги ва кенглиги ўртача ўлчамда бўлган шарфларни куртка ёки пальто устидан ўраш ёки шунчаки ташлаб олиш кўпроқ қишки образ учун мос.
Жуда узун шарфлар бўйни икки маротабага паст кўрсатиши билан бирга, ноқулайлик туғдириши мумкин. Шунингдек, гавданинг деярли ярмини тўсиб турадиган узун шарфлар қишки образга мукаммаллик бахш этмайди.
Шарф одатдан бош кийим билан уйғунлашиши керак. Тўғри, ҳозир аввалгидек шарф ва бош кийими бир тўплам бўлиши шарт эмас. Шунчаки, улар мато, ранг ёки дизайн жиҳатидан бир-бирига мос келиши лозим.
Шарф ранги кийим ёки бош кийими билан мос келиши керак. Кундалик образда макияжсиз юрадиган хонимлар ёрқин ва барчани эътиборини тортадиган рангларни чеклагани маъқул. Бунинг учун классик ранглар тавсия этилади, улар ҳар қандай образга тўғри келади.
Нақш ва ёзувли шарфлар урфда. Аммо танланган образни ҳам инобатга олиш зарур. Бу каби шарфларни танлаган хонимлар либосининг содда ва ортиқча безакларсиз бўлишини унутмаслиги лозим.
Битта шарфни ҳар қандай услубдаги кийим билан уйғунлаштириб бўлмайди. Классик услублар учун одатда ипак, курткалар учун эса жун ёки тўқилган шарфлар тўғри келади.
Шарфларни мавсумга ва об-ҳавога қараб танлашни унутмаслик лозим. Қиш учун қалин, баҳор ва куз учун эса бироз калта ва юпқа шарфлар харид қилиш тавсия этилади.
Шарф танлашда яна бир муҳим жиҳат — бу сифатдир. Сифатсиз шарфлар тезда катишка бўлиб кетади, натижада ҳар қандай шоҳона образга путур етказади.
Шарф тақишни ҳам инобатга олиш зарур. Уларни мураккаб тарзда ўраб олиш шунчаки бачкана кўриниш ҳосил қилади. Ҳозирда шарфларни бўйинга ташлаб олиш ёки классик услубда ўраб олиш урфда.
Изоҳ (0)