Аксессуарлар ҳар қандай образда муҳим ва деярли асосий ролни эгаллайди. Улар тасвирни тўлдириши ёки путур етказиши ҳам мумкин. Сумка моделига ҳам алоҳида эътибор бериш керак: у нафақат қулай бўлиши, балки бутун комбинацияга уйғун равишда мос келиши керак. Marie Claire нашри совуқ мавсумда қайси сумка моделларидан воз кечиш кераклиги ва уларни ёзгача гардеробда қолдиришни маълум қилди.
Кросс-боди — гавданинг ўрта қисмидан тақиладиган сумкалар ёз мавсуми учун айни муддао. Аммо қишда ундан фойдаланиш бироз муаммоларга сабаб бўлади. Чунки пар куртка, қалин пальто ёки бошқа қалин устки кийимлар устидан уларни тақиш ноқулайлик туғдиради. Қолаверса, кийим юзасида бурмалар пайдо бўлади. Шунинг учун ҳам мазкур модель қиш фасли учун мос келмайди.
Занжирли сумка моделлари, албатта, ажойиб дизайн бўлиши мумкин. Аммо қиш фасли учун эмас. Биринчи навбатда, металл безаклар совуқда музлайди. Иккинчидан, қиш учун бироз жиддий моделлар тавсия этилади. Бу каби ёрқин ва нафис моделлар баҳор-ёз коллекциясига тегишли.
Тўқилган сумка моделлари асосан ёз ойлари учун айни муддао. Чунки бу саёҳат, дам олиш ёки турли хил дўстлар учрашувига мос келади. Шунинг учун мавсумга кўра, мазкур моделни қиш фаслида тақиш тавсия этилмайди.
Ўта кичик ҳажмдаги сумка моделлари қиш учун мос эмас. Чунки қишда нисбатан қалин ва кенг кийимлар кийилади. Бу каби кичик ҳажмли сумкалар эса образга умуман мос келмайди. Қолаверса, қишда сумкада олиб юриладиган буюмлар кўпаяди. Шунинг учун совуқ мавсумда катта ҳажмли сумкалар тақиш яхшироқ.
Қиш мавсуми учун ёрқин рангларни мослаш бироз қийин. Чунки қишда кўпроқ тўқ ва жиддий ранглардан образлар яратилади. Баҳор ҳамда ёзда ёрқин рангли либосларга мурожаат қилинади ва уларга мос равишда оч рангли сумка моделлари танланади. Мутахассислар шунинг учун ҳам қишда ёрқин рангли сумкаларни тавсия этмайди.
Классик моделдаги сумкалар офис учун ажойиб танлов. Аммо уни ҳам қишки образлар учун мослаш муаммо туғдиради. Ёки классик сумкага қараб, бутун бошли образни ўзгартиришга тўғри келади. Шунинг учун уларни тақишни бироз кейинроққа қолдирган маъқул.
Пистон ёки бошқа безаклар билан бойитилган сумка моделлари ҳам иссиқ кунлар ёки бирор базм учун мос келиши мумкин. Лекин ҳар кунлик фойдаланишда бу каби моделлар ноқулайлик туғдиради.
Аслида юқорида санаб ўтилган моделлар қиш учун ҳам мўлжалланган, фақатгина уларни ўз вақтида, байрам, махсус учрашув ёки кечалар учун мўйнали ёки жун пальтолар билан уйғунлаштириш мумкин.
Изоҳ (0)