Энди жисмоний шахслар қиймати 100 миллион сўмгача бўлган тайёр заргарлик буюмларини йўловчи божхона декларациясини тўлдирмасдан, 100 миллион сўм ва ундан ортиқ бўлганларини йўловчи божхона декларацияси асосида Ўзбекистон божхона ҳудудидан ташқарига олиб чиқишлари мумкин. Бу ҳақда Давлат божхона қўмитаси ахборот хизмати хабар берди.
Маълум қилинишича, заргарлик буюмларини ишлаб чиқарувчи якка тартибдаги тадбиркорлар заргарлик буюмларини йўловчи божхона декларациясини тўлдирган ҳолда, маълумотларни Ташқи савдо операцияларининг ягона электрон ахборот тизимига киритмасдан Ўзбекистон божхона ҳудудидан ташқарига тижорат мақсадларида олиб чиқишлари мумкин.
2023 йил 1 февралдан бошлаб аффинаж корхоналари ва заргарлик буюмларини ишлаб чиқарувчилар, қимматбаҳо металларни ва таркибида қимматбаҳо металлари мавжуд бўлган хом ашёни божхона ҳудудида қайта ишлаш божхона режимига жойлаштиришда, божхона ҳудудида қайта ишлаш божхона режимига жойлаштирилган қимматбаҳо металларни ва таркибида қимматбаҳо металлари мавжуд бўлган хом ашёни қайта ишлаш маҳсулотларини Ўзбекистон божхона ҳудудидан ташқарига олиб чиқишда махсус турдаги товарларни экспорт ва импорт қилиш учун лицензия олиш мажбуриятидан озод этилади.
2026 йил 1 январга қадар марварид, олмос, қимматбаҳо ва ярим қимматбаҳо тошларга (ТИФ ТНнинг 7101-7104 позициялари) импорт божхона божлари нол фоиз этиб белгиланди.
Қўмита ахборот хизматининг «Дарё»га қўшимча қилишича, аввалги тартибда жисмоний шахслар қиймати беш минг долларгача бўлган тайёр заргарлик буюмларини йўловчи божхона декларациясини тўлдирмасдан мамлакатдан олиб чиқишлари мумкин бўлган.
Изоҳ (0)