Ҳиндистон Уттар-Прадеш озиқ-овқат хавфсизлиги ва дори воситаларини бошқариш департаменти «Док-1 Макс» дорисини ишлаб чиқарувчи Marion Biotech Pvt. Ltd компаниясининг лицензиясини тўхтатиб қўйди. Бу ҳақда Moneycонтрол хабар берди.
Лицензиянинг тўхтатилиши Ўзбекистонда болаларнинг «Док-1 Макс» препаратини қабул қилиши оқибатида вафот этгани билан боғлиқ.
«Биз Marion Biotech компаниясининг дори ишлаб чиқариш лицензиясини тўхтатиб қўйдик. Компания ишлаб чиқариш қоидабузарликлари сабаблари ҳақидаги сўровимизга жавоб бермади», — дейди расмий.
Marion Biotech асосчилари Ноида заводида ҳар хил турдаги дори-дармонларни ишлаб чиқариш учун иккита: Форм 25 ва Форм 28 лицензияларига эга бўлган.
«Компания биологик ва нобиологик дори воситаларини ишлаб чиқариш учун иккита турдаги лицензияга эга эди ва иккаласи ҳам кейинги огоҳлантиришгача тўхтатиб қўйилган», — дейилади хабарда.
30 декабрь куни Marion Biotech компанияси директорларига расмий хабарнома юборилган ва уларга 5 январгача жавоб бериш буюрилган. Компания 5 январгача жавоб бермаганидан кейин регулятор лицензияни тўхтатиб туришни кечиктирган. Бунга компаниянинг йўтал сиропи синовлари натижаларини кутаётгани сабаб бўлган.
«Биз қўшимча вақт бердик, бироқ компания жавоб бермади ва текшириш чоғида заводда аниқланган қоидабузарликларни баҳолаб, ишлаб чиқариш лицензиясини тўхтатиб туриш тўғрисида қарор қабул қилинди», — дейди Уттар-Прадеш озиқ-овқат хавфсизлиги ва дори воситаларини бошқариш департаменти.
Маълумот ўрнида, Ҳиндистонда ишлаб чиқарилган «Док-1 Макс» сиропини истеъмол қилиш ортидан Ўзбекистонда 20 дан ортиқ бола вафот этган.
Мавзуга доир:
- Ҳиндистонда «Док-1 Макс» дорисини ишлаб чиқариш тўхтатилди
- Ҳиндистонда «Док-1 Макс» дорисини ишлаб чиқарган компанияга қарши иш очилди
- Ҳиндистонда «Док-1 Макс» дорисини ишлаб чиқарган завод устидан текширувнинг дастлабки натижалари эълон қилинди
- ЖССТ Ўзбекистонда «Док-1 Макс» дорисидан болалар ўлгани юзасидан муносабат билдирди
Изоҳ (0)