Адлия вазирлиги айрим оммавий ахборот воситаларини давлат бошқарувидаги маъмурий ўзгаришларни нопрофессионал ёритаётганликда айблади.
Вазирлик муносабатида маъмурий ислоҳотларга оид Ўзбекистон президенти фармони ва қарори лойиҳалари чуқур таҳлиллар асосида миллий ва халқаро экспертлар иштирокида ишлаб чиқилгани, бироқ айрим ОАВ томонидан масалани асоссиз субъектив талқин қилишга ҳаракатлар кузатилаётгани келтирилган.
«Мамлакатимизда эълон қилинган маъмурий ислоҳотлар юзасидан айрим ОАВ ва ижтимоий тармоқларда турлича қарашлар баён этилмоқда. Албатта, фикрлар хилма-хил бўлгани яхши, лекин айрим ОАВ ва ижтимоий тармоқлар масалани мутахассис бўлмаган ёки зарур билим ва тажрибаси бўлмаса-да, ўзларини эксперт деб эълон қилаётган шахслар билан интервьюлар ташкил қилиб, ўз кузатувчиларига ислоҳотларни бир томонлама фақат салбий томондан кўрсатиш ва баҳолаш билан шуғулланмоқда.
Аввало, шуни таъкидлаш лозимки, бундай масалада у ёки бу фикр, баҳони беришда зарур билим, малака ва тажрибага эга бўлиш, чуқур таҳлилга асосланиш мақсадга мувофиқ. Чунки маъмурий ислоҳотдек ўта профессионал масалани енгил-елпи ёндашувлар, ўзининг ҳиссиёт ва қарашлари орқали баён этиш, айниқса ОАВ орқали тарқатиш масъулиятсизликдан бошқа нарса эмас», — дейилади манбада.
Адлия вазирлиги ҳозирги тайинловларга янги ҳукуматни шакллантириш сифатида баҳо бериш ҳолатлари ҳам кузатилаётгани, аммо бу нотўғри қараш эканини ҳам билдирган.
«Мамлакатда янги ҳукуматни шакллантириш тартиби Конституцияда белгиланган. Унга мувофиқ, Вазирлар Маҳкамаси янгитдан сайланган Олий Мажлис олдида ваколатларини зиммасидан соқит қилади. Яъни, ҳукумат таркиби янги Олий Мажлис шаклланганда янгиланади. Шу сабабли, мазкур тайинловларда ҳукумат таркибини янгилаш мақсади қўйилмаган, аксинча, мақбуллаштириш натижасида янги ташкил этилган давлат бошқаруви органлари раҳбарлигига янгитдан тайинловлар амалга оширилди.
Айни пайтда маъмурий ислоҳот ҳукумат таркибини янгилашни англатмаса-да, амалда вазирларнинг қарийб учдан бир қисми янги ёки тайинланганига бир йил ҳам тўлмаганлигига эътибор қаратишимиз лозим. Шундай экан, ҳукумат таркиби эскича қолди, дейиш масалага камида нопрофессионал ёндашув бўлганини кўрсатади.
Фармонда айрим функцияларни хусусий секторга ўтказиш орқали тегишли соҳаларни ривожлантиришга алоҳида эътибор берилади. Натижада, тугатилган функцияни амалга оширувчи мавжуд лавозимлар қисқартирилади. Ушбу жараён босқичма-босқич амалга оширилади. Бирданига ходимларни 30 фоизгача қисқартириш деган тушунча нотўғри.
Шу билан бирга, мазкур оптималлаштириш барча давлат ташкилотларига бирдек татбиқ қилинмайди. Уларнинг бажараётган вазифа ва функциялари таҳлил қилиниб, айрим давлат ташкилотларида 5-10 фоизгача, айримларида эса 30 фоизгача қисқариши мумкин», — дея муносабат билдирган Адлия вазирлиги.
Аввалроқ президент «Янги Ўзбекистон маъмурий ислоҳотларини амалга ошириш чора-тадбирлари тўғрисида»ги фармонни имзолагани хабар қилинганди. Ҳужжатга асосан, 2023 йил 1 январдан бошлаб мустақил фаолият юритувчи республика ижро этувчи ҳокимият органларининг сонини 61 тадан 28 тагача, шу жумладан вазирликлар сонини 25 тадан 21 тагача қисқартириш белгиланган.
Изоҳ (0)