Ўзбекистонда 2022 йилда бир қатор давлат ва жамоат арбоблари вафот этди. «Дарё» улардан айримлари ҳақида маълумот беради.
Ўзбекистон Қаҳрамони
Май ойида Ўзбекистон Қаҳрамони, машҳур фермер, «Нурли обод» фермер хўжалиги раҳбари Лола Муротова 64 ёшида вафот этди.
Шу муносабат билан президент Шавкат Мирзиёев, ҳукумат ва парламент вакиллари таъзия билдирган.
Лола Муротова вафотидан олдин бетоб бўлиб касалхонада даволанаётганида давлат раҳбари топшириғи билан бош вазир ўринбосари Шуҳрат Ғаниев ва соғлиқни сақлаш вазири Беҳзод Мусаев унинг ҳолидан хабар олганди.
Президент Фарғонага ташрифи давомида Лола Муротованинг бетоблиги ҳақида ҳам тўхталиб ўтганди.
«Кеча кечқурун бир масала мени қийнади. Лола опа бугун залда ўтиришлари керак эди. Аммо бетоб бўлиб қолибдилар. Ўзим бориб кўриб келай десам, шифокорлар беморни безовта қилмаслик кераклигини айтишди. Кўнглим жуда ғаш бўлди. Кўп шифокорларни юбордим. Яратганга илтижо қиламиз, тез кунларда соғайиб кетиб, сафимизга қайцинлар», — деган эди президент .
Лола Муротова 1958 йилда Фарғона вилоятининг Олтиариқ туманида туғилган. Ўрта мактабни тамомлагач, меҳнат фаолиятини тумандаги «Нуробод» жамоа хўжалигида механизатор сифатида бошлаган ва кейинчалик пудратчи, бўлим бошлиғи, хўжалик раиси каби лавозимларда ишлаган. Лола Муротова туманда «Нурли обод» фермер хўжалигига асос солган. Фермер қишлоқ хўжалиги соҳасида илғор агротехнологияларни, бошқарувнинг замонавий усуллари ва самарали воситаларини қўллаш, ер ва сув ресурсларидан оқилона фойдаланиш, ёш фермерлар авлодини тарбиялашда ўзига хос тажриба мактабини яратган.
Лола Муротова жамоат ишларида ҳам фаол бўлган. У ёшлар ва хотин-қизларни замонавий касб-ҳунарларга ўргатиш, уларни иш билан таъминлаш, эҳтиёжманд оилаларни қўллаб-қувватлашга қаратилган эзгу ишларни бажарган.
Лола Муротова Халқ депутатлари Фарғона вилояти кенгаши депутати, Олий Мажлиси Сенати аъзоси сифатида ҳам самарали иш олиб борган.
Лола Муротова давлат ва халқ олдидаги хизматлари учун Ўзбекистон Республикасида хизмат кўрсатган қишлоқ хўжалиги ходими, «Эл-юрт ҳурмати», «Фидокорона хизматлари учун» орденлари ҳамда Ўзбекистон Қаҳрамони олий унвони билан мукофотланган.
Ангрен шаҳри ҳокими
2022 йил май ойида Ангрен шаҳри ҳокими Нуриддин Абдураҳимов вафот этди.
У 1978 йилда Тошкент вилоятининг Пискент туманида туғилган. Мутахассислиги бўйича молиячи эди.
2022 йилнинг 31 январида Ангрен шаҳри ҳокими этиб тайинланганди. Яъни ҳоким бўлганидан 4 ой ҳам ўтмасдан қазо қилган.
Бу лавозимни эгаллагунга қадар у Президент администрациясининг масъул ходими сифатида фаолият юритиб келган. Маълумотларга кўра, Нуриддин Абдураҳимовнинг ўлимига инфаркт сабаб бўлган.
Янгиер шаҳар ҳокими
Жорий йилнинг июль ойида Сирдарё вилояти Янгиер шаҳар ҳокими Илёр Хўжаев бетоблик туфайли вафот этди.
Бу ҳақда вилоят ҳокимлиги хабар берган.
Илёр Хўжаев 1977 йилда Сирдарё вилоятида туғилган. 1999 йилда Тошкент давлат аграр университетини, 2009 йилда Президент ҳузуридаги Давлат ва жамият қурилиши академияси қошидаги Олий бизнес мактабини тамомлаган. Гулистон шаҳар, Боёвут тумани Молия бўлими раҳбари, Гулистон шаҳар ҳокимининг биринчи ўринбосари каби турли лавозимларда фаолият юритган.
«Сирдарё вилояти ҳокимлиги жамоаси ўзининг эзгу сўз, эзгу амаллари билан халққа беминнат хизмат қилган Хўжаев Илёр Аҳмад ўғлининг оила аъзолари ва барча яқинларига чуқур ҳамдардлик билдиради», — дея таъзия билдирган ҳокимлик.
Изоҳ (0)