Украиналик энг бадавлат 20 та бизнесменнинг бойлиги 2 баробарга қисқарди

Украинанинг энг бадавлат 20 фуқаросининг бойлиги февраль ойидан бери 40 миллиард доллардан 22,5 миллиард долларгача қисқарди. Бу ҳақда «РБК» хабар бермоқда.

Йил охирида Метинвест ва ДТЕК эгаси Ринат Ахметов энг бой украиналик бўлиб қолди. Унинг активлари қиймати 13,7 миллиард доллардан 4,4 миллиард долларга тушди.

Иккинчи ва учинчи ўринларда инглиз тилида мулоқот қилишга ёрдам берувчи сунъий интеллектга асосланган Grammarly онлайн платформаси эгалари Максим Литвин ва Алексей Шевченко (4 миллиард доллардан 2,3 миллиард долларгача) бўлди.

Тўртинчи ўрин Интертйпе темир йўл транспорти учун ғилдираклар ишлаб чиқарувчи компанияга эгалик қилувчи Виктор Пинчукка тегишли (2,6 миллиард доллардан 2,2 миллиард долларгача).

Рейтингнинг кучли бешлигини (2,1 миллиард доллардан 1,4 миллиард долларгача) Феррехпо кон компанияси эгаси Константин Жеваго якунлади.

Украинанинг собиқ президенти Пётр Порошенко 12-ўринни эгаллади (1,6 миллиард доллардан 730 миллион долларгача), Игорь Коломойский эса Украина фуқаролигидан маҳрум қилингани учун умуман рейтингга киритилмаган.

Бир йил аввал Порошенко еттинчи, Коломойский эса тўртинчи ўринни эгаллаган эди.

Forbes’нинг тушунтиришича, бу йилги рўйхат мамлакатнинг етакчи бизнесменларини солиштириш учун эмас, балки уларнинг ўн ойлик жанговар ҳаракатлардан қандай омон қолганини кузатиш учун тузилган.

Нашр янги тадбиркорларнинг пайдо бўлишини асосий тенденция деб атаган, шу билан бирга, «эски мактаб бизнесменлари»нинг даври ўтаётганини таъкидлаган.

Уларнинг йўқотишлари активлари ҳажмидан номутаносиб равишда каттароқдир. Энг яхши 20 таликка «билимлар иқтисодиёти»да бойлигини деярли Украина давлати билан умуман кесишмаган ҳолда ишлаб топган олти нафар тадбиркор киритилди, — деб тушунтирди нашр.

Украиналик ишбилармонларнинг фикрича, ҳозирда бизнеснинг капиталлашувини баҳолаб бўлмайди.