Япония ҳукумати чет эл фуқароларига қўл меҳнати билан боғлиқ ишларни бажаришга имкон берувчи «махсус малакали ишчилар дастури» орқали Марказий Осиё давлатларидан кўпроқ хорижий ишчи кучини олиб келишни режалаштирмоқда. Бу ҳақда The Japan News хабар берди.
Япония ташқи ишлар вазири Ёшимаса Хаяши 24 декабрь куни Токиода Япония ва Марказий Осиёнинг бешта давлати ташқи ишлар вазирлари ўртасидаги учрашувда бу режа ҳақида маълум қилиши кутилмоқда.
Нашр ёзишича, бу ҳаракат Ўзбекистон, Қозоғистон, Қирғизистон, Тожикистон ва Туркманистоннинг ўзига ишончини рағбатлантириш ҳамда минтақада кучли таъсирга эга бўлган Россия ва Хитойни жиловлашга қаратилган деб баҳоланмоқда.
Хаяши Япониянинг «одамларга сармоя киритиш» ва «ўсиш сифати»га урғу бериб, Марказий Осиёнинг барқарор ривожланишига ҳисса қўшишини қайд этади.
Япония 2019 йилда Ўзбекистон билан инсон ресурсларини қабул қилиш бўйича ҳамкорлик меморандумини имзолаган ва яна тўрт давлат билан ҳам шунга ўхшаш ҳужжатларни имзолаш учун музокараларни йўлга қўймоқчи.
Марказий осиёлик меҳнат муҳожирларининг аксарияти Россияда ишлайди. Япония ташқи ишлар вазирлигининг юқори мартабали расмийси айтишича, бу давлатлардан кўпроқ чет эллик ишчиларни қабул қилиш ва «ишчиларга малакасини ошириб, ундан ўз ватанида фойдаланишга рухсат бериш» орқали Россияга қарамликни камайтириш мумкин.
Марказий Осиё жуда кўп табиий ресурсларга, жумладан нефтга эга, аммо экспорт асосан қўшни Хитой ва Россия билан чегараланган. 17 декабрь кунги йиғилишда Хаяши, шунингдек, Япония Марказий Осиёнинг беш давлатига экспорт бозорларини диверсификация қилишда ёрдам беришини ва декарбонизация технологияларини ишлаб чиқишда ҳамкорлик қилишини маълум қилган.
Изоҳ (1)
"Жиловлашга каратилга" деб ёзибдими!!!! Японияда ишлагани одам етишмайди. Кейинги 50 йилга яна 10 миллион ишчиларга улар мухтож! Жилов учун деб сиёсатга буриб юборибдида.