Сурхондарёда учта туман электр таъминоти корхонаси раҳбарларига нисбатан жиноят иши қўзғатилди

Сурхондарёнинг Шеробод, Музработ ва Узун тумани электр таъминоти корхонаси (ТЕТК) раҳбарларига нисбатан жиноят иши қўзғатилди. Бу ҳақда вилоят прокуратураси матбуот хизмати хабар берди.

Шеробод ТЕТК бошлиғи Қ.К. мансаб ваколатидан қасддан фойдаланиб, тумандаги 208 нафар юридик ва жисмоний шахслар томонидан электр энергиясидан фойдаланиш қоидаларини бузгани ҳолати юзасидан расмийлаштирилган 487 миллион 20 минг сўмлик далолатномалар тегишли тартибда қонуний чора кўриш учун ҳуқуқни муҳофаза қилувчи органларга тақдим этмаган.

Мазкур ҳолат юзасидан 12 декабрь куни Жиноят кодексининг 205-моддаси 2-қисми «а» банди жиноят иши қўзғатилиб, ҳозирда дастлабки тергов ҳаракатлари олиб борилмоқда.

Музработ туман электр таъминоти корхонаси бошлиғи А.Қ. ва бошқалар хизмат вазифаларини лозим даражада бажармасдан, юридик шахснинг электр энергиясидан 263 миллион 707 минг 882 сўмлик тўлов муддати ўтган дебиторлик қарздорлиги мавжуд бўлсада, истеъмолчиларни электр энергия тармоғидан узмасдан, қарздорликни ундириш чораларини кўрмасдан жамият ва давлат манфаатларига жуда кўп миқдорда зарар етказилишига сабабчи бўлган.

Шунингдек, сув таъминот бўлими муҳандис энергетиги Б.К. сув насослари ҳамда электродвигателларни электр ҳисоблагичдан ташқари тўғридан-тўғри электр тармоғига улаб фойдаланиб келгани оқибатида «Сурхондарё ҳудудий электр тармоқлари» корхонаси манфаатларига 129,7 миллион сўм зарар етказилган.

Мазкур ҳолат юзасидан 12 декабрь куни Жиноят кодексининг 205-моддаси 2-қисми «а» банди, (жуда кўп зарар етказган ҳолда ҳокимият ёки мансаб ваколатини суиистеъмол қилиш) 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) 3-қисми билан жиноят иши қўзғатилиб, ҳозирда дастлабки тергов ҳаракатлари олиб борилмоқда.

Узун ТЕТК бошлиғи Ғ.А. ва бошқаларга нисбатан мансаб ваколатидан қасддан фойдаланиб, «Искандар Турдиалиев», «Нурафшон», «Агро Омад» фермер хўжаликлари электр тармоқларидан ноқонуний фойдаланиши оқибатида жами 140 миллион 832 минг сўмлик кўп миқдорда зарар етказилгани аниқлаган бўлса-да, етказилган моддий зарарни ўрнини қоплаш чоралари кўрмаган.

1 декабрь ҳолатига кўра 2 миллиард 638 миллион сўмлик қарздорлиги мавжуд бўлса-да, электр энергияси тармоғидан узмасдан жамият ва давлат манфаатларига жуда кўп миқдорда зарар етказилишига сабабчи бўлган.

Мазкур ҳолат юзасидан Узун тумани прокуратураси томонидан Жиноят кодексининг 205-моддаси 2-қисми «а» банди билан жиноят иши қўзғатилиб, ҳозирда дастлабки тергов ҳаракатлари олиб борилмоқда.